Авьяас билэгт бөх А.Сүхбат хэвлэлд ярилцлага өгчээ. Юутай ч тэрээр Монголын үндэсний бөхийн холбооны удирдлагатай холбоотой ярилцлага өгсөн нь хэний ч сонирхлыг татна.

      Тэрээр “Хэн МҮБХ-ны тэргүүн болохыг бөхчүүд маань шийднэ. Миний хувьд МҮБХ-ны үйл ажиллагаа нь зөв замдаа орох нь чухал болохоос биш тэргүүний суудалд хэн суух нь чухал биш. МҮБХ-ны үйл ажиллагааг зөв хөтлөөд явчих залуус бий. Түүнээс биш Р.Нямдорж гэдэг хүний хов жив, атгаг санаа сонин биш. Би ийм жижиг зүйл хөөцөлддөггүй. Бөхчүүдийнхээ дунд яс хаяж, нутаг усаар нь талцуулдаг удирдлага одоо зайгаа тавимаар юм. Би монгол бөх, МҮБХ-ны цаашдын ирээдүйд л санаа зовниж явдаг” гэснээс харвал тэр Р.Нямдоржтой “нэгийгээ үзэлцэж, нэхий дээлээ уралцах” бололтой.

     Эх сурвалжийн хэлж байгаагаар Х.Баянмөнх аваргын фракц Бөхийн холбооны тэргүүнд хүч үзэхээр бэлтгэлдээ гарч, багаа бүрдүүлээд байгаа аж.

    Мөн тэрээр “Одоогийн удирдлагууд монгол бөхийн хөгжлийг сөнөөж байна. Энэ хүмүүс суудлаа эрт тавьж өгсөн бол монгол бөх арай өөр түвшинд байх байлаа. МҮБХ барилдааныг удаашруулан хянадаг техник ашигладаггүйгээс бөхчүүдийн хооронд маргаан их гарсаар байгаа. МҮБХ-ны нэр хүнд өдөр ирэх тусам унаж байна” гээд зогсохгүй  “Монгол бөх бол ардын хүүхдийн ариун дэвжээ болохоос биш хэсэг бүлэг луйварчны худал хуурмагийн талбар биш” гэжээ.

    Ийм чухал цаг үед олны хүндлэл хүлээсэн нэртэй бөх ийн ярьсан нь огт санамсаргүй хэрэг биш. Тэгэхээр энэ бүгдийн ар талд “Увсын” хэмээх фракц зогсож байгааг төвөггүйхэн харж болохоор. Тэгэхээр энэхүү хуралдаанаар А.Сүхбат, Р.Нямдорж нарын дунд тулаан өрнөх нь дамжиггүй аж.