Монголын түмний уламжлалт сар шинийн баяр дөхөж буйтай холбогдуулан иргэдийн хэрэгцээ шаардлагад тулгуурлаж цахим орчинд бараа бүтээгдэхүүн хямд зарах нэрээр бусдыг залилах гэмт хэрэг өсөх хандлагатай байгаа юм. Тoдруулбал, Фэйсбүүк орчинд "Угалзтай гутал зарна" гэх хуурамч зарын дагуу холбогдож, барааны урьдчилгаа болох 750,000 төгрөгийг шилжүүлэн залилуулсан хэрэг цагдаагийн байгууллагад бүртгэгдсэн байна.

Өнгөрсөн онд улсын хэмжээнд залилах гэмт хэрэг 16,906 бүртгэгдсэнээс бараа, үйлчилгээ захиалж хохирсон 5,214 хэрэг бүртгэгдсэн аж. Тэрчлэн залилагчид зах зээлийн үнээс хямд үнэ амлах, цөөн тоогоор үлдсэн тул яаралтай зарна, чанартай, загварлаг барааг түргэн шуурхай хүргэж өгнө гэх мэтээр итгэл төрүүлэхүйц хуурамч зар байршуулж, урьдчилгаа төлбөр шаарддаг байна.

Иймд иргэд та бүхэн цахим худалдан авалт хийхдээ мэдээллийг сайтар нягтлах, барааг биеэр үзэж, гар дээрээ хүлээн авахаас өмнө ямар нэгэн байдлаар урьдчилгаа төлбөр шилжүүлэхгүй байхыг анхаарууллаа.