Үндэсний статистикийн хорооны даргын 2026 оны А/11 дүгээр тушаалаар 2026 онд мөрдөх хүн амын амьжиргааны доод түвшний хэмжээг шинэчлэн баталж, захиргааны хэм хэмжээний актын улсын нэгдсэн сангийн 7543 дугаарт бүртгэжээ. Тус шинэчилсэн дүн нийгмийн халамж, шүүхийн шийдвэр гүйцэтгэл болон холбогдох бусад харилцаанд албан ёсоор мөрдөгдөх эрх зүйн үндэс бүрдэж байна.

2026 онд амьжиргааны доод түвшинг бүсчилсэн байдлаар тогтоосон бөгөөд Улаанбаатар хотод 543,700 төгрөг байхаар баталжээ.

Баруун бүс буюу Баян-Өлгий, Говь-Алтай, Завхан, Увс, Ховд аймагт 538,700 төгрөг, Хангайн бүсийн Архангай, Баянхонгор, Булган, Өвөрхангай, Хөвсгөл, Орхон аймагт 526,200 төгрөг, төвийн бүсийн Говьсүмбэр, Дорноговь, Дундговь, Өмнөговь, Сэлэнгэ, Төв, Дархан-Уул аймагт 522,300 төгрөг, харин зүүн бүсийн Дорнод, Сүхбаатар, Хэнтий аймагт 519,200 төгрөг байхаар тус тус тогтоосон байна. Амьжиргааны доод түвшин нь иргэн, өрхийн наад захын хэрэгцээг хангахад шаардлагатай сарын орлогын доод хэмжээг илэрхийлдэг чухал үзүүлэлт бөгөөд ядуурлын түвшинг тодорхойлох, нийгмийн хамгааллын бодлого боловсруулах, зарим төрлийн тэтгэмж, тэтгэлгийн хэмжээг тогтоох суурь болдог аж.

Үнийн өсөлт, инфляци, өрхийн хэрэглээний бүтэц зэрэг нийгэм, эдийн засгийн нөхцөл байдлыг харгалзан уг хэмжээг жил бүр шинэчлэн тогтоодог.

Гэр бүлийн тухай хуульд зааснаар шүүх тэтгэлгийн хэмжээг тогтоохдоо тухайн бүс нутагт мөрдөж буй амьжиргааны доод түвшинг баримтална. Тухайлбал, 0–11 хүртэлх насны хүүхдэд тухайн бүсийн амьжиргааны доод түвшний 50 хувиар, 11–16 насны /суралцаж байгаа бол 18 нас хүртэл/ болон насанд хүрсэн боловч хөдөлмөрийн чадваргүй хүүхдэд амьжиргааны доод түвшний хэмжээгээр тооцож тогтоохоор хуульчилсан. 2026 онд батлагдсан шинэчилсэн дүн нь хүүхдийн тэтгэлэг, тэжээн тэтгэхтэй холбоотой төлбөр, шийдвэр гүйцэтгэх ажиллагаанд шууд нөлөөлөх юм.