Хаврын чуулган өндөр үүдээ дэлгэж, хөшгөө нээлээ. Мэдээж хэрэг нэгэн танхимд багтахгүй олон асуудал цугларсан энэ мөчид тойргоос сонгогдсон гишүүдийн хувьд орон нутагт чамгүй ажиллаж байгаа нь харагдсан. Тйимээс орон нутгаас тулгамдсан асуудал гэхээсээ илүүтэй бухимдал ганзагласан гишүүд ирж богцоо задлах нь ч ойлгомжтой. Хаврын чуулганы нээлтийн анхаарал татсан зүйл бол Ерөнхийлөгч У.Хүрэлсүхийн хэлсэн үг байлаа.

Тэрбээр “Хөдөө аж ахуй, хүнс үйлдвэрлэлийн салбарт дэвшил гарч, ард иргэд, баялаг бүтээгчид, төр, засаг хамтдаа зүтгэсний үр дүнд эдийн засаг 6.8 хувиар өсөж, нэг хүнд ногдох Дотоодын нийт бүтээгдэхүүн 7,000 ам.долларыг давж, хөрөнгө оруулалт нэмэгдэн, гадаад валютын нөөц долоон тэрбум ам.доллар болж, зээлжих зэрэглэл дээд түвшинд хүрлээ. Улс орны аюулгүй байдлын баталгаа болсон хүнсний хангамжийг сайжруулах зорилгоор хэрэгжүүлж буй “Хүнсний хувьсгал” үндэсний хөдөлгөөний хүрээнд нийт 53 хүнсний үйлдвэр шинээр ашиглалтад орж, баялаг бүтээгчид 1,000 гаруй төрлийн хүнсний бүтээгдэхүүнийг үйлдвэрлэн зах зээлд нийлүүлсэн амжилтыг гаргалаа” хэмээн онцолсон.

Ерөнхийлөгч У.Хүрэлсүх бүрэн эрхийнхээ хүрээнд УИХ-ын тухай хуульд нэмэлт, өөрчлөлт оруулах тухай хуулийн төслийг санаачлан боловсруулж, УИХ-д өргөн мэдүүлээд байгаа. Хаврын чуулганы нээлтэд Ерөнхийлөгчийн хэлсэн үг тэр чигтээ Төрийн албан хаагчийн, тэр тусмаа УИХ-ын гишүүдийн ёс зүй, хариуцлагын тухай байв. Энэ нь ч Үндэснэний эв нэгдлийг илэрхийлэгчийн хувьд зүй ёсны хэрэг.

Тиймээр тэр “Ард иргэдийнхээ өндөр итгэл, өргөн дэмжлэг дор УИХ-ын гишүүнээр сонгогдсон хэн боловч хүний ёсыг умартан, ёс зүйн алдаа гаргаж, өргөсөн тангаргаасаа няцах аваас Үндсэн хуульд заасны дагуу хариуцлага хүлээдэг байхыг ард иргэд, сонгогч олон төр, засгаасаа шахаж шаардаж байна. Парламентын гишүүн авлига, албан тушаалын гэмт хэрэгт холбогдож, ёс зүйн ноцтой зөрчил гаргадаг ч гишүүний дархан эрхээр халхавчилж, хууль, шүүхийн өмнө иргэн бүр тэгш эрхтэй байx Үндсэн хуулийн зарчмыг хөсөрдүүлж байгаад ард түмэн бухимдсаар байна. УИХ бол хэн нэгнийг хуулийн хариуцлагаас хамгаалах бамбай, эсвэл гэмт хэрэгтнийг нуун далдлах орон байр биш юм” гэлээ.

Ерөнхийлөгчөөс өргөн мэдүүлсэн “УИХ-ын гишүүнийг эргүүлэн татах” хууль түмэн олны дэмжлэгийг 100 хувь авч байгаа. Мэдээж хэрэг “бүрэн эрх”-ээр халхавчилсан УИХ-ын гишүүдийн хувьд 100 хувь таатай хүэлэн авна гэж байхгүй. Манай парламентад гурван шатны шүүхээр буруутай нь батлагдсан хэрнээ “Бүрэн эрх”-ээр халхавчилан сууж байгаа гишүүн ч бий. Өдгөө мөрдөн шалгах, шүүх шатанд шалгагдаж байгаа гишүүд ч бий. Сэжигтнээр цоллуулсан гишүүд ч байгаа учраас тухайн хуулийг дэмжихгүй байх хэсэг бүлэг нөхөд бий.

Ийм учраас Ерөнхийлөгч У.Хүрэлсүх “Монгол Улсын Ерөнхийлөгч төр, засагтаа итгэх ард түмний итгэлийг сэргээх, эв нэгдлийг хангах, ардчилсан парламентын засаглал, парламентын дархлааг улам бататган бэхжүүлэх, УИХ-ын гишүүний ёс зүй, хариуцлагыг дээшлүүлэх зорилгоор Үндсэн хуульд заасан бүрэн эрхийнхээ хүрээнд Монгол Улсын Их Хурлын тухай хуульд нэмэлт, өөрчлөлт оруулах тухай хуулийн төслийг санаачлан боловсруулж, УИХ-д өргөн мэдүүлсэн. Үүнийг зарим хүн “парламентын дархлаанд халдаж байна” гэж шүүмжилж байгааг би мэдэж байгаа. Болгоомжлол байгааг ч хүндэтгэн ойлгож байна. Миний байр суурь маш тодорхой. Монголд ардчилсан парламентын засаглал хүчтэй байх ёстой. Хэн нэгний эрх мэдлийг нэмэх, хэн нэгнийг хэлмэгдүүлэх тухай би огт яриагүй” гэдгээ ч дуулгасан. Мэдээж хэрэг Ерөнхийлөгчөөс өргөн мэдүүлсэн тус хууль таагүй хандаж байгаа нөхдөд зориулсан үг байх.

Ийм учраас Ерөнхийлөгч “Парламентын дархлаа гэдэг нь хуулийн хамгаалалтаас илүү ард түмнийхээ итгэл, сэтгэл дээр оршдог гэдгийг ямагт санаж явах учиртай. Гэтэл энэ их итгэл, сэтгэлийг умартан иргэд сонгогчдынхоо дургүйцлийг дэвэргэх нь парламентыг дотроос нь нураах хамгийн том аюул гэдгийг санаж байх хэрэгтэй. Хэрэв та ард түмнийхээ итгэл, сэтгэлийг дааж байгаа бол энэ хууль таныг хамгаална. Үүнээс айх хэрэг огт байхгүй” хэмээн онцолсон.

Эцэст нь тэр Төрийн түшээд та бүхэн “Түмний төлөө төр оршдог” гэсэн зарчмыг үндэс болгон ард түмнийхээ хүсэл шаардлагыг хүндэтгэж, улс, үндэстнийхээ язгуур эрх ашгийг эрхэмлэн, парламентын дархлааг бататган бэхжүүлэхийн төлөө энэ хуулийн төслийг хэлэлцэн батална гэдэгт төрийн тэргүүн итгэл дүүрэн байна” гэдгээ уламжилсан юм.