Б.Энхбаяр Хууль зүй, дотоод хэргийн сайдаар томилогдсон даруйд Ерөнхий сайд асан Л.Оюун-Эрдэнийн тухай ноцтой баримтууд дэлгэж эхэлсэн. Тиймээс сөргүүлэн, Ерөнхий сайд асан Л.Оюун-Эрдэнэ “Лхагвын тойм” нэвтрүүлэгт орохдоо Хууль зүй, дотоод хэргийн сайд Б.Энхбаярын тухай ноцтой баримтууд ярьсан. Тэдний яриад байгаа аман баримтууд хүн итгэх аргагүй ч хариуцлагатай алба залгуулж явсан эрхэм хоёр хүн зүгээр ч нэг олны өмнө гарч ирээд “зодолдоогүй” нь лавтай. Гагцхүү аль аль нь ийм авлигач хулгайчууд байв уу. Хөшигний ар талд улс төр халуухан өрнөж, эрх мэдлийн төлөөх тулаан дээд цэгтээ хүрснээр бүх зүйл дэлгэгдэж бие биенийхээ булхайг дэлгэж байна уу. Эсвэл энд зүгээр улс төрийн зорилгоор нэг нэгэндээ зориулж зохиол бичээд байна уу гэдгийг мэдэх арга алга. Яагаад гэхээр үүнийг шүүхээс эцэслэн тогтоогоогүй байна.

Б.Энхбаяр сайд Л.Оюун-Эрдэнийг Оюутолгой компаниас 20 сая ам.доллар гаргуулж аван, үүнийгээ хувийн компанидаа төсөл хэрэгжүүлэх нэрээр зарцуулсан. Нүүрсний зургаан оффтейк гэрээний дөрөв нь Л.Оюун-Эрдэний хийсэн гэрээ. Монголын түүхэнд хамгийн их хохирол учруулсан 10 тэрбум ам.долларын Харбины хэлцлийг Л.Оюун-Эрдэнэ байгуулсан. "Гэрэгэ тауэр"-ын 14 давхрыг дээрэмдэхийн тулд н.Хишигбаяр гэх залууг хориод, эхнэрт нь давхар хэрэг үүсгэсэн. Эхнэр нь МАН-аас жагсаалтаар нэр дэвшсэн Нандин-Эрдэнэ гэх эмэгтэй юм билээ. Л.Оюун-Эрдэнэ өөрийнх нь асар том хулгай илчлэгдэж, орох байх газаргүй болсон тул адилхан авлигач гэх байдал руу намайг оруулж, олон нийтийн толгойг эргүүлж байна гэх зэргээр удаа дараа байр сууриа илэрхийлж ирсэн.

Харин энэ бүхний эцэст Ерөнхий сайд асан Л.Оюун-Эрдэнэ Б.Энхбаяр сайдын тухай 894 хуудас материалыг АТГ-т хүлээлгэн өглөө. Тэрбээр нэвтрүүлэгт орохдоо Хууль зүй, дотоод хэргийн сайд Б.Энхбаярыг "Бодь" группээс хандив нэрээр 500 мянган ам.доллар авсан байж болзошгүй талаар мэдэгдэж, уг асуудлыг АТГ-т шалгуулахаар өгнө гэдгээ илэрхийлж байв. Мөн тэрбээр Б.Энхбаяр сайд, Дэд сайд Д.Мөнх-Эрдэнэ нартай холбогдуулан, "Бодь"-той холбоотой оффтейк гэрээний асуудал, нүүрсний сонсголтой холбоотой асуудлууд, Б.Энхбаярын авлигын шинжтэй байж болзошгүй асуудлууд, холбогдох гэрч, нотлох баримтууд, бусад авлигын асуудлуудыг тус тус багцлан АТГ-т өглөө.

Үүнд Нүүрсний сонсголын түр хороог шинэчилж, УИХ-ын гишүүн Б.Энхбаяраар ахлуулсан гэдгийг та бүхэн мэднэ. Нүүрсний сонсгол ес хоногийн турш зохион байгуулагдсан ч энэ хугацаанд оффтейк гэрээтэй холбоотой асуудлыг хангалттай хөндөөгүй, мөн валютын нөөцтэй холбоотой Засгийн газрын тогтоолыг дурдаагүй, Б.Энхбаяр эхэлсэн цэгээсээ сонсголын дундуур маш их өөрчлөгдсөн гэдгийг ч хэлсэн. Түүнчлэн Б.Энхбаяр нь "Бодь Интернэшнл" ХХК-ийн захирал Д.Баясгалантай хоёр хүний хамт дөрвүүлээ уулзах үеэрээ нэг удаад 500 мянган ам.доллар, дараагийн удаад 800 мянган ам.доллар буюу нийт 1.3 сая ам.долларыг бэлнээр авсан байж болзошгүй талаар мэдээлэл өгсөн. Үүний зэрэгцээ хууль зүй, дотоод хэргийн Дэд сайд Д.Мөнх-Эрдэнэ Голомт банканд хуулийн зөвлөхөөр ажиллаж байсан. Мөн Л.Отгонбаяртай хамтарч "Солонго Мөнх партнерс" ХК болон "Легал Линк Си Би Эй" ХК–аар дамжуулан "Тавантолгой төмөр зам" компаниас зөвлөх үйлчилгээний нэрээр нийт 11 тэрбум төгрөгийн санхүүжилт авсан байж болзошгүй баримт бас байгаа аж. Тиймээс Ерөнхий сайд асан Л.Оюун-Эрдэнэ уг асуудлыг гэрчүүд холбогдох баримтын хамт АТГ-т хүлээлгэн өглөө.

Ихэс ахсын тулаан одоогоор аман баримтад тулгуурлан өрнөж байгаа ч яг таг индэр дээр гаргаад ирсэн баримт байхгүй. Б.Энхбаяр сайдын хувьд Ерөнхий сайд асан Л.Оюун-Эрдэний талаар зургаан сарын өмнөөс баримт ярьсан ч өнөөдрийг хүртэл хууль хяналтын байгууллагаар шалгаагүй, ямар нэг гэм буруутайд тооцоогүй байна. Харин Ерөнхий сайд асан Л.Оюун-Эрдэнийн хувьд энэ сараас эхлэн Б.Энхбаяр сайдын талаар аман баримт дэлгэж эхэлсэн. Эцэстээ ихсийн “зодоон” юунд хүрч зогсохыг таах аргагүй.

Tumen.mn