Ерөнхий сайд Г.Занданшатарын хувьд Л.Оюун-Эрдэнийн кабинетын бүрэлдэхүүнтэй ажиллаж байгаа. Хуучин засгаас Шадар сайд асан С.Амарсайхан явсан бусад нь сууж байна. УИХ-ын чуулган эхлэхээр АН-ын бүлгээс гал ирнэ гэх айдаст түрэгдэж, муу ажиллаж байгаа Дэд сайдуудыг ч явуулна гэв. Эрчим хүчний сайд Б.Чойжилсүрэн, Боловсрол шинжлэх ухааны сайд П.Наранбаяр нарыг засгаас туучихав. Төрийн данхар бүтцийг цомхон чадварлаг болгоно ч гэв.

Энд үнэн хэрэгтээ Б.Чойжилсүрэнг явуулаад эрчим хүчний салбарт эргэлт гарчихгүй. П.Наранбаярыг явуулаад боловсролын салбар өөрчлөгдөхгүй. Гагцхүү бид эрчим хүчний чиглэлд эрс шинэчлэл хийлгэх сонирхолгүй, энэ салбарт хэрэгжүүлэх гэж байгаа төсөл хөтөлбөрийг гацаадаг, нураадаг мафийг олж устгах хэрэгтэй. Боловсрол, шинжлэх ухааны салбар ч ялгаагүй.

Гэхдээ Ерөнхий сайд Г.Занданшатар Л.Оюун-Эрдэнэийн танхимтай ажиллаж байгаа. Тиймээс нэгэнт бэлэн хэрэгжээд дуусах шатандаа орчихсон төслүүд дээр очсон хэр нь ашиг сонирхлын зөрчилтэй аижллаж байгаа Зам, тээвэр хөгжлийн сайд Б.Дэлгэрсайхан, ямар ч үүрэггүй ажиллаж байгаа Шадар сайд Т.Доржханд гээд явуулах ёстой дүрүүд бий. Эхний ээлжинд эдгээр сайд нарыг явуулах ёстой.

Шадар сайд Х.Ганхуяг гэж нөхөр байхад Т.Доржханд гэж Шадар сайдаар яах гээд байгаа юм. Энд л өнөөх данхар бүтцийн чинь гол цөм бий. Зам, тээвэр хөгжлийн сайдын хувьд төмөр зам, иргэний агаарын тээвэр, авто зам гээд бүхий л салбарт шинэчлэл хийгдэж, ихэнх нь төсөл нь дуусах шатандаа явж байхад Зам, тээвэр хөгжлийн сайдаар томилогдсон ч барианд орох гэж байсан төслүүд гацсан. Сүүлийн таван жилд хэрэгжсэн төслүүдээс нэгийг нь ч барианд оруулсангүй. Дээр нь ашиг сонирхлын зөрчилтэй энэ мэт сайдуудаасаа салах хэрэгтэй.

Айсуй улс төрийн зам, Ерөнхийлөгч, УИХ-ын сонгуульд МАН хэрхэн орох вэ гэхээсээ илүүтэй Засгийн газрын бүтцээ бодох ёстой цаг нэгэнт иржээ. Ер нь бол ямар ч Ерөнхий сайд танхимаа өөрийн болгож байж цааш явах ёстой. Өнгөрөгч зургаадугаар сард Л.Оюун-Эрдэнийг унагааж байж засаг авсан биз дээ. Гэтэл өрсөлдөгчийнхөө танхимтай ажиллаж байна гэж юу байхав.

Tumen.mn