Ипотекийн зээлд хамрагдаж чадахгүй, урьдчилгаа төлбөр бүрдүүлэх боломжгүй иргэдэд зориулсан “түрээслэн өмчлөх” орон сууцны хөтөлбөр буюу Хан-Уул дүүргийн 21-р хороонд баригдаж буй “Солонго-1” төсөл 2026 оны долдугаар сард ашиглалтад орж, наймдугаар сараас цахимаар сонгон шалгаруулалт явуулахаар төлөвлөөд байгаа аж .

Мөн "Солонго-2" төслийн хүрээнд 3000 орчим айлын орон сууц баригдаж, 2027 онд ашиглалтад орох юм байна. Энэ талаар ТӨХХК-ийн газрын дарга Ж.Энхбаатараас тодрууллаа.

Ж.Энхбаатар “Түрээслэн өмчлөх орон сууцанд хамрагдах иргэдийн бүртгэлийг цахимаар авч, түүнээс сонгон шалгаруулалт явуулна. Оочер, дараалал үүсгэхгүй, бүртгэлд үндэслэн шалгаруулалт хийнэ. Энэхүү хөтөлбөр нь шууд өмчлүүлэх бус, урьдчилгаа бүрдүүлэх боломж олгож, олон өрхийг үе шаттайгаар хамруулах зорилготой. Ойрын хугацаанд хэрэгжих төслүүд нь “Солонго-1, 2”, “Залуус-1” бөгөөд наймдугаар сараас бүртгэл эхэлнэ” гэлээ .

СОНГОН ШАЛГАРУУЛАЛТ БҮРЭН ЦАХИМААР БОЛНО

Иргэдийн хүсэлтийг цаасаар бус зөвхөн цахим Хур, Дан системээр хүлээн авч, төрийн мэдээллийн нэгдсэн сантай уялдуулан шалгаруулах юм. Өмнө өгсөн хүсэлтүүд хүчингүй болж, бүгд шинээр бүртгүүлэх шаардлагатай болсон. Мөн оролцогч нь өөрийн нэр дээр орон сууцгүй байх, шаардлагатай бүх мэдээллийг цахимаар илгээж болно. Шинэ журмаар тодорхой бүлгүүдэд квот олгожээ. Үүнд:

Төрийн үйлчилгээний ажилтан (эмч, багш) – 25%

Төрийн албан хаагч – 15%

Ахмад настан – 18%

Хөгжлийн бэрхшээлтэй иргэн – 10%

Мөн залуу гэр бүл, олон хүүхэдтэй болон өрх толгойлсон гэр бүлүүдийг хамруулах зохицуулалтыг тусгасан. Гэвч нийт хүсэлт гаргагчдын тоо өндөр байх нөхцөлд эдгээр квот бодитоор хэр хүрэлцэх нь тодорхойгүй. Журмын дагуу төрийн орон сууцыг Түрээслэх, Түрээслээд өмчлөх, Газар, эд хөрөнгийг орон сууцаар солих, Дахин төлөвлөлтийн үед иргэдийг түр байрлуулах гэсэн дөрвөн хэлбэрээр ашиглуулах боломжтой болсон байна.

Шинэ журамаар баталсан шийдвэрүүдээс дараах асуудлууд гарч болзошгүй. Жишээ нь Түрээсийн төлбөр зах зээлийн үнээс хямд байна. Жишээ нь, 50–60 м² байрны түрээс Улаанбаатар хотод 11,000–15,000 төгрөг/м² байна.

Ингэснээр 50 м² байрны сар бүрийн төлбөр 550,000–750,000 төгрөг байна

Мөн түрээслээд өмчлөх гэрээгээр орох иргэд таван жилийн дотор урьдчилгаа төлбөрөө бүрдүүлэх ёстой. Энэ хугацаанд санхүүгийн боломж бүрдээгүй тохиолдолд дараагийн өрхөд боломж шилжих зохицуулалттай. Иргэдийн хүсэлт цахимаар хүлээн авч, ил тод шалгаруулалт явуулах ч, хүсэлт гаргах өрхийн тоо төслийн хүчин чадлаас хэт их байвал өрсөлдөөн эрс нэмэгдэнэ.