Зөвлөлдөх санал асуулгын хоёр дахь шатанд модератор, туслахаар ажиллах иргэдэд Зөвлөлдөх зөвлөлийн ажлын алба, Засгийн газрын Хэрэг эрхлэх газраас сургалт зохион байгууллаа. Зөвлөлдөх санал асуулгын тухай хууль болон зөвлөлдөх санал асуулгын онцлог, ач холбогдол, зөвлөлдөх уулзалтын үеэр модератор, туслахууд хэрхэн ажиллах, бүлгийн хэлэлцүүлгүүдийг чиглүүлэхдээ юуг анхаарах талаар эрдэмтэн, судлаач, эрх зүйчид танилцуулга хийв.

“Монгол хүн баялгийнхаа эзэн” зөвлөлдөх санал асуулгын хоёр дахь шатны хэлэлцүүлэг, зөвлөлдөх уулзалт ирэх бямба, ням гарагт Төрийн ордонд болно. Уг зөвлөлдөх уулзалтад орон даяар зохион байгуулагдсан эхний шатны санал асуулгаас сонгогдсон 800 иргэн оролцоно. Эдгээр иргэн нэгдсэн хэлэлцүүлгээс гадна 53 бүлэгт хуваагдан ажиллаж, Үндэсний баялгийн сангийн өнөөгийн байдал, тулгамдсан асуудлаар өөрсдийн байр сууриа илэрхийлж, давтан асуулга бөглөх юм. Дээрх бүлгүүдийн хэлэлцүүлгийг нийт 120 модератор, туслах чиглүүлж ажиллана.

Хоёр өдөр үргэлжлэх бүлгийн ажил, хэлэлцүүлгийн үр дүнд Зөвлөлдөх уулзалтад оролцогчдоос “Монгол хүн баялгийнхаа эзэн” байх, Үндэсний баялгийн сангийн орлогыг нэмэгдүүлэх, хөрөнгийг хуваарилах, зарцуулах, удирдлага, менежментийг нь сайжруулах асуудлаар зөвлөмж гаргана.