УИХ-ын чуулганы хуралдаанаар Ж.Чинбүрэн тэргүүтэй дөрвөн гишүүний өргөн мэдүүлсэн Эрхтэн, эд, эс шилжүүлэн суулгах тухай хуулийн төслийн анхны хэлэлцүүлгийг хийлээ.

УИХ-ын гишүүн О.Батнайрамдал: -Эрхтэн, эд, эс шилжүүлэн суулгах тухай хууль бол хүний амь нас аврах буянтай хууль.

Донор болохоо илэрхийлэх энэ өөрөө эдийн засгийн шинжлэх ухаан. Тэр дундаа зан төлөвийн эдийн засаг дээр тод гарч ирдэг. Дэлхийн зарим оронд анхны сонголт нь бүгд донор байж байгаад донор биш болох юм бол өөрийн биеэр бүртгүүлээд донороос гарах хүсэлтээ өгөөд гаргадаг. Үүний сонгодог жишээ Испани, Австри, Герман байна. Донороос гарах сонголтыг өөрөө хийдэг байх шийдлийг хэрэгжүүлсэн улс орны донорын хүртээмж хамаагүй илүү байдаг. Үүнийг хэрэгжүүлсэн нь үр дүнтэй байсан юм биш үү. Хүмүүс донор болоход татгалзахгүй мөртлөө цахимаар ороод өөрсдөө бүртгүүлэх нь маш ховор.

Ажлын хэсгийн ахлагч, УИХ-ын гишүүн Б.Баярбаатар: -Дэлхийн жишигт үндсэн Opt out, Ort in гэх хоёр арга хэрэгсэл хэрэгжээд явж байгаа. Opt out-аар явах хүсэл эрмэлзэл байсан. Гэхдээ бид зан заншил, шашин шүтлэгээ харгалзаж Ort in аргыг хуульдаа тусгаж өгсөн. Бид хууль батлагдсанаар хэдэн хүний амь нас аврагдах вэ гэдэг асуудал дээр онцгой анхаарал хандуулж байна.

Амьд сэрүүндээ өөрөө донор болох хүсэлтээ өгчихсөн бол гэр бүлийн гишүүнээс нь зөвшөөрөл авах шаардлага байхгүй. Тархины цус харвалтаар жилд 3000 орчим хүн нас бардаг. Энэ дотроос амьгүй донорын шаардлага хангаж байгаа хүн маш цөөхөн. Дараа хууль эрх зүйн орчноо бий болгосны дараа Opt out руу шилжих боломж байгаа

Эрүүл мэндийн хөгжлийн төвийн Эрхтэн шилжүүлэн суулгах үйл ажиллагаа зохицуулах албаны дарга Б.Алтантулга: -Өнөөдрийн байдлаар Монгол Улс Ort in системээр явдаг. ДЭМБ, дэлхийн эрхтэн шилжүүлэх холбооноос өгч байгаа зөвлөмжийн дагуу тухайн улс орны нийгмийн боловсролын түвшинг харгалзаж алинаар нь явахыг нь зөвлөдөг. Монгол Улс түрдээ Ort in системээрээ яваад цаашдаа Opt out систем рүү шилжих шаардлагатай гэх зөвлөмжийг ирүүлдэг.