Үндэсний Статистикийн Хороо, Гэр Бүл, Хөдөлмөр, Нийгмийн Хамгааллын Яамтай хамтран НҮБ-ын Ази, Номхон далайн эдийн засаг, нийгмийн комиссын дэмжлэгтэйгээр “Өгөгдлийн хүч: Өгөгдлийг бодлогод ашиглах нь” сургалт зохион байгуулагдаж байна.

Энэ сарын 12-14 хүртэл үргэлжлэх тус сургалтаар Ази, Номхон далайн бүс нутгийн өгөгдлийн засаглал, хөгжлийн туршлагаас танилцуулж, Монгол Улсад өгөгдлийн засаглалын тогтолцоог бүрдүүлэхэд тулгарч буй сорилт, боломжийн талаар хэлэлцэж байгаа юм.

Сургалтын үеэр ҮСХ-ны дарга Б.Батдаваа “Үндэсний Статистикийн Хорооноос сүүлийн жилүүдэд “Төрийн нэгдсэн өгөгдлийн сан” болон “Төрийн мета өгөгдлийн нэгдсэн сан”-г хөгжүүлж, “Үндэсний өгөгдлийн засаглалын замын зураглал” боловсруулахын зэрэгцээ төрийн мэдээллийн сангуудын бэлэн байдлыг үнэлэх ажлуудыг үе шаттай хэрэгжүүлж байна. Эдгээр ажлыг хэрэгжүүлэх явцад хууль эрх зүйн хязгаарлагдмал байдал, хувийн мэдээлэл хамгаалах асуудал, байгууллага хоорондын уялдаа болон мэдээллийн сангуудын өгөгдлийн чанар, хүний нөөцийн ур чадвар зэрэг бодит сорилтууд тулгарсаар байгаа. Энэхүү гурван өдрийн сургалт нь өгөгдлийн талаар ойлголтыг гүнзгийрүүлж, бодлого, шийдвэр гаргахад өгөгдлийг оновчтой ашиглах ур чадварыг нэмэгдүүлж, тогтолцоог бэхжүүлэхэд чухал ач холбогдолтой” хэмээн онцоллоо.

Сургалтад бодлого боловсруулагчид, судлаачид, олон улсын болон төрийн байгууллагуудын төлөөлөл оролцож байна.