УИХ-ын чуулганы өнөөдрийн үдээс өмнөх нэгдсэн хуралдаанаар Татварын ерөнхий хуульд нэмэлт, өөрчлөлт оруулах тухай хуулийн төслийн эцсийн хэлэлцүүлгийг хийлээ.

Хэлэлцүүлгийн үеэр төслийг эцсийн хэлэлцүүлэгт бэлтгэсэн талаарх Төсвийн байнгын хорооны санал, дүгнэлтийг УИХ-ын гишүүн Б.Мөнхсоёл танилцуулсан юм. Энэ үеэр Нэмэгдсэн өртгийн албан татвар (НӨАТ)-ын босгыг нэмэгдүүлэхтэй холбоотой асуудал олны анхаарлыг татлаа.

Засгийн газраас НӨАТ төлөгчөөр бүртгүүлэх орлогын босгыг одоогийн 50 сая төгрөгөөс 400 сая төгрөг болгон нэмэгдүүлэх санал оруулсан ч Ажлын хэсэг уг саналыг дэмжээгүй байна.

Энэ талаар УИХ-ын гишүүн, Ажлын хэсгийн ахлагч Х.Ганхуяг тайлбарлахдаа, “Засгийн газраас НӨАТ-ын босгыг 50 сая төгрөгөөс 400 сая төгрөг болгох хуулийн төсөл өргөн барьсан. Харин Ажлын хэсгийн зүгээс босгыг 50 сая төгрөг хэвээр үлдээх зарчмын зөрүүтэй санал гаргаж байна. Учир нь босгыг хэт нэмэгдүүлснээр татвараас зайлсхийх, орлогоо нуун дарагдуулах боломж нэмэгдэнэ гэж үзсэн” гэв.

Тэрбээр мөн чөлөөт бүсээс архи, тамхи зэрэг онцгой албан татвартай бүтээгдэхүүнийг баяр ёслолын өмнө зохион байгуулалттайгаар улс орон даяар борлуулж, төлбөрийг хувь хүмүүсийн дансаар авдаг тохиолдлууд байдаг талаар дурдсан юм. Ингэснээр Засгийн газрын санал болгосон 400 сая төгрөгийн босгыг дэмжихгүйгээр, одоогийн мөрдөж буй 50 сая төгрөгийн босгыг хэвээр үлдээх санал чуулганы эцсийн хэлэлцүүлгийн шатанд орж ирээд байна.