Оросын иргэдийн зуны амралтын гол чиглэл болдог эзлэгдсэн Крымийн хойгийн эрх баригчид хүүхдийн зуслангууд болон аялал жуулчлалтай холбоотой үйл ажиллагаануудаа есдүгээр сарын нэгнийг хүртэл хааж байгааг Даваа гарагт зарлажээ. Уг арга хэмжээгээ Украины агаарын цохилтын улмаас бензин шатахууны ноцтой хомсдол үүссэнтэй холбон тайлбарласан байна. Дэлхийн гурав дахь том газрын тосны үйлдвэрлэгч Орос улсад Украины алсын зайн цохилттой холбоотой бензин, шатахууны хомсдол үүссэн нь нийслэл Москва хотод хүртэл нөлөөлж эхлээд байгаа. Крымийн шатахуун түгээх станцууд Ням гарагаас эхлэн хувь хүн, бизнесийн байгууллагуудад шатахуун зарахаа зогсоосон. Үүнээс өмнө хатуу хязгаарлалттай түгээж байсан юм.

Тус бүс нутгийн захирагч Сергей Аксёнов хүүхдийн зуслангуудыг хаах шийдвэр нь олон нийтийн аюулгүй байдлын ашиг сонирхолд нийцэж байгааг тайлбарлажээ. “Үүссэн нөхцөл байдлыг ойлгоно гэдэгт найдаж байна” гэж тэр Телеграм хуудсаараа мэдэгдсэн байна. Орос улс өнгөрсөн долоо хоногт шатахууны үйлдвэрлэлийнхээ 25 орчим хувийг алдаж, 2025 оны мөн үетэй харьцуулахад хэмжээ нь өдрийн 90,000 тонн болж буурсныг салбарын эх сурвалжууд мэдээлсэн юм.

Европын хэсэг дэх Липецк, Ростов, Татарстан, Воронежоос гадна Сибирийн зүүн хэсгийн Эрхүү зэрэг Оросын олон бүс нутагт бензин түлшний хангамж тасалдсан буюу хомсдол үүссэнийг эрх баригчид мэдээлж байна.

Москва хотын шатахуун түгээх станцууд 95 октантай бензин, дизель түлш зарахгүй байгааг эх сурвалжууд мэдээлжээ.

Эх сурвалж: Reuters