Хэрэглээний бараа, үйлчилгээний үнэ улсын хэмжээнд аравдугаар сард өмнөх оны мөн үеэс 13.4 хувиар эрчимжсэн бол Говь-Алтай, Увс, Сэлэнгэ аймагт 18-18.8 хувьтай байгаа нь хамгийн өндөр буюу улсын дунджийг таван нэгж хувиар давлаа. Харин Улаанбаатар хотод хэрэглээний бараа, үйлчилгээний үнэ 12.1 хувьтай гарсан нь улсын дунджаас доогуур үзүүлэлт болж байна.

Сүхбаатар аймагт бараа, үйлчилгээний үнийн өсөлт хамгийн бага түвшинд буюу 11.9 хувьтай гарсан бол Дундговь, Булган аймагт инфляц улсын дунджаас доогуур түвшинд байгаа аж. Харин бусад аймагт бараа, үйлчилгээний үнэ улсын дунджаас дээгүүр түвшинд хадгалагдаж байна. Хүнсний бүлгийн үнийг харвал улсын дундаж 19.8 хувьтай байгаа бол баруун бүсийн аймгуудад өмнөх оны мөн үеэс 25.1 хувиар өссөн нь хамгийн өндөр дүн боллоо. Зүүн болон хангай, төвийн бүсэд хүнсний инфляц 18.8-21.9 хувиар эрчимжсэн байна. Үнийн өсөлтөд хүнсний бараа, ундаа усны бүлгийн үнэ 40 хувь, тээврийн үнэ 21 хувийн оролцоотой байгаа нь хамгийн өндөр хувийг бүрдүүлж буй. Улсын хэмжээнд нийт өрхийн 20 орчим хувь нь сард дунджаар 2.1 сая төгрөгийн бодит орлоготой. Үүний дотор 97.3 мянга орчим өрх 1.1 сая төгрөгөөс доош орлоготой, 106 мянга орчим өрх 1.1-1.6 сая орчим төгрөгийн бодит орлоготой байгааг статистик мэдээлэл харуулж байна.

Эдгээр өрх хүнсний бүтээгдэхүүний зардалд сарын нийт мөнгөн орлогынхоо 32-37 орчим хувийг зарцуулж байгаа аж. Хүнсний бараа, бүтээгдэхүүний үнэ 25.1 хүртэлх хувиар эрчимжсэн нь нийт зардлынхаа 35 орчим хувийг хүнсэнд зарцуулдаг ялангуяа бага орлоготой өрхүүдэд ихээхэн дарамт болж байна.

Засгийн газар үнийн өсөлтийг бууруулахын тулд цалин тэтгэвэр нэмэх, гол нэрийн хүнсний бүтээгдэхүүний нөөц бүрдүүлэх зэргээр арга хэмжээ авч буй. Хэдий тийм боловч 2027 оны төсвийн зарлага энэ оноос найм орчим их наяд төгрөгөөр тэлж батлагдахаар байгаа нь эрэлтийг нэмэгдүүлж, эдийн засаг дахь төрийн оролцоог тэлснээр үнийн өсөлтийг улам өдөөх эрсдэлтэйг эдийн засагчид шүүмжилж байгаа юм.