Сураггүй болсон Малайзын онгоцыг “Сүйрсэн байж магадгүй” гэв

Энэ онд Малайз улс агаарын тээвэрт тун азгүй байлаа. Саяхан 12 дугаар сарын 28-нд шилжих шөнө сураггүй болсон тус улсын AirAsia компанийн зорчигч тээврийн онгоцыг сүйрсэн байж болзошгүйг Индонезийн дэд ерөнхийлөгч Юсуф Калла мэдэгдлээ. Индонезийн аврах комиссийг ахалж буй тэрбээр «Онгоц сүйрсэн гэх магадлалтай» гэж сэтгүүлчдэд хэлсэн байна. Гэвч уг онгоц яг хаана сүйрсэн нь тодорхойгүй ажээ. Эрлийн ажил үргэлжилж байна. Тэрхүү QZ8501 дугаартай Airbus A320-200” онгоцонд 162 хүн зорчиж явсан юм. Зорчигчдын 156 нь Индонезийн иргэд бөгөөд Өмнөд Солонгосын гурав, Сингапур, Малайз, Францын тус бүр нэг иргэн уг онгоцонд байжээ. Зорчигчдын 16 нь хүүхэд байв. Нислэгийн багийн гишүүдийн зургаа нь Индонез, нэг нь Франц хүн аж.

Airbus A320 нисэх онгоц нь Индонезийн Сурабай хотоос Сингапурын чиглэлд нисээд холбоо тасарсан байна. Онгоц 9,75 километрээс 11,5 километр хүртэл өндөр авах үедээ хамгийн сүүлд мэдээлэл өгсөн байлаа.

Өнгөрөгч 3 дугаар сарын эхээр Малайзын агаарын тээврийн Боинг 777 онгоц Куала Лампур хотоос Бээжинг зорьж яваад сураггүй болсон бөгөөд өнөөг хүртэл онгоцны сэг зэм хийгээд ослын шалтгаантай холбоотой ямар ч баримт олдоогүй байгааа. Онгоцонд хөлгийн 12 гишүүн, мөн 14 орны 227 иргэн зорчиж байжээ. Тэгвэл энэ удаа сураггүй болсон Airbus A320-200 онгоцны учир шалтгаан ч “нууц” байна. Чухам хэзээ энэ нууц ил болохыг одоогоор таашгүй ажээ.