Аж үйлдвэр, эрдэс баялгийн яамны Төрийн нарийн бичгийн дарга Б.Дашпүрэвээс өнөөдөр /2026.09.24/ шатахууны нөхцөл байдалтай холбоотой мэдээллийг тодрууллаа.

-Шатахуун олгохгүй байгаа, ШТС-уудад урт дараалал үүссэн гэх мэдээлэл байна. Ямар асуудал үүсэв?

-Бид есдүгээр сарын захиалгаа ОХУ, БНХАУ, БНСУ гэсэн гурван улсаас хангалттай нийлүүлэхээр гэрээлсэн. Нийлүүлэлт хэвийн, тасралтгүй үргэлжилж байна. Гэхдээ ОХУ-аас хоёр хоногийн хугацаанд тээвэрлэлт багассантай холбоотойгоор түгээлтэд саатал үүссэн. Дунджаар өдөрт 50 вагон шатахуун ачигдан ирж байгаа. Тиймээс энгийн хэрэглээг хангах боломжтой. Харин бид тодорхой хэмжээний нөөц бүрдүүлж чадахгүй байгаа нөхцөл байдалтай байна. Есөн хоногийн нөөцтэй байсан бол тодорхой хэмжээнд өсөж, 10 гаруй хоногийн нөөц бүрдүүлэх боломжтой. Гэвч тээвэрлэлт багасахад нөөц мөн дагаад буурдаг. Ийм нөхцөл байдал үүсээд байна. ОХУ-аас орж ирж байгаа бүтээгдэхүүний хэмжээгээр авч үзвэл 25 мянган тонн бүтээгдэхүүн дутуу байгаа. Тиймээс энэ хэмжээг нөхөж, бүтээгдэхүүнийг бүрэн хэмжээгээр нь ачиж өгөх саналыг ОХУ-ын талд илэрхийлсэн. ОХУ-ын нөхцөл байдал хүнд байгаа. Үүнтэй холбоотойгоор БНСУ болон БНХАУ-аас мөн бүтээгдэхүүн татан авч байна. Үүний үр дүнд БНХАУ-аас АИ-92 төрлийн 8000 тонн автобензин орж ирсэн. Ингэснээр хэвийн үеийн горимыг бий болгоно. Тодорхой хэмжээний нөөц бүрдүүлэх, эсвэл шатахуун хомсдох вий гэсэн болгоомжлолоор их хэмжээний дараалал үүсгэхгүй байхыг иргэдээсээ хүсмээр байна.

Одоогоор цаг агаар хэт хүйтрээгүй байгаа энэ үед нөхцөл байдлыг тал талаасаа ойлгож, хамтарч даван туулах хэмнэлтэй байх чиглэлд анхаарах хэрэгтэй. Зөвхөн Улаанбаатар хотод өдөрт 10 тэрбум төгрөгийн бензин хэрэглэж байна. Өдөр бүр 10 тэрбум төгрөгийн шатахуун хэрэглэж байгаа нь эдийн засгийн хувьд хэр үр ашигтай вэ гэдэг нь анхаарах асуудал. Тиймээс энэ үед аль болох нийтийн тээврээр зорчиж, тодорхой хэмжээний хэмнэлт хийх нь газрын тосны бүтээгдэхүүний нөөцийг нэмэгдүүлэх, хэт хүйтрэхээс өмнө нөөц бүрдүүлэх боломжийг бий болгоно.

-БНХАУ-аас импортолж байгаа шатахууны үнэ хэр байх вэ? Есдүгээр сард шатахууны үнэ нэмэгдэхгүй гэж салбар яамнаас мэдээлсэн. Ирэх сард үнэ нэмэгдэх үү?

-Энгийн АИ-92 төрлийн бүтээгдэхүүний үнэ нэмэгдээгүй. Харин Евро-5 төрлийн бүтээгдэхүүний хувьд БНХАУ болон ОХУ-аас орж ирж буй бүтээгдэхүүний үнэ нэмэгдсэн. Орж ирсэн 8000 тонн бүтээгдэхүүний тухайд одоогийн үнээрээ үргэлжилнэ. Аравдугаар сарын шатахууны үнийг есдүгээр сарын 25-нд хуралдаж шийднэ. Тиймээс одоогоор үнийн талаар тодорхой хэлэх боломжгүй байна.