Нийтийн дууны ертөнцөд хэсэг залуус хүч түрэн орж байсан нь өдгөө бүгд төрдөө хүндлэгдэж, түмэндээ дээдлэгдсэн нэр зүстэй уран бүтээлчид болон өсч өндийжээ. Ийнхүү хориод жилийн өмнө давалгаа болж урлагийн хаалгаар орж ирж байсан дуучид дунд дуэть буюу хос дуучид цөөнгүй төрөн гарсан. Тэр хэрээр ч нийгмийн анхааралд орж чадсан. С.Жавхлан, Т.Баясгалан, Т.Батсайхан, Г.Эрдэнэтунгалаг, Ч.Бат-Эрдэнэ, Э.Оюумаа, Б.Энхмэнд Б.Чинболор гээд нэрээд байвал цөөнгүй нэрс цуврах байх.
Харин өдгөө эдгээр хос дуучид тэр бүрий хамтын уран бүтээлд шамдахаа больсон гэхэд хэтийдсэн хэрэг болохгүй. Цагийн аяс дагаж хувь хувийнхаа уран бүтээл, амьдрал ахуйгаа хөөсөн гэхэд болно.
Гэтэл Ч.Бат-Эрдэнэ, Б.Энхмэнд нар хамтарсан уран бүтээлийн тоглолт хийхээр болсон нь олны анхаарлыг татаад буй. Учир нь энэ хоёр дуучин чухам яагаад хамтрагчаа солих болов. Ч.Бат-Эрдэнэ, Э.Оюумаа нарын урьд өмнийн хайр сэтгэлийн холбоо нь ийнхүү хамтрагчаа солиход хүргэсэн гэж байгаа бол Б.Чинболор, Б.Энхмэнд нар ч гэр бүлийн асуудлаас болж хоёр тийшээ болсон тухай шуугиан дэгдэж байна.
Учир нь Б.Энхмэндийн гэр бүл болох яруу найрагч Н.Баянмөнх нь эхнэртээ Б.Чинболортой хамтрахгүй байхыг захисан гэх мэдээлэл бий. Захихаар барахгүй энэ тухай эхнэртээ үүрэгдсэн гэдгийг ойрын эх сурвалж хэллээ. Хөндлөнгийн эх сурвалжийн хэлж байгаагаар бол Б.Энхмэндийн нөхөр Н.Баянмөнх найрагч Б.Чинболор хоёрын дунд томоохон зөрчил үүссэн учраас ийнхүү эхнэртээ үүрэгдсэн юм байх.
Юутай ч Ч.Бат-Эрдэнэ, Б.Энхмэнд нар хамтрагчаа сольж шинээр дуэть дуулах болсон нь олны анхаарлыг өрөийн эрхгүй татаад байна.
Эх сурвалж: Unen.mn
