Венесуэл улс даяар 20 мянган хурууны хээ уншигчийг супермаркетуудад суурилуулах ажил эхлээд байгаа талаар “ВВС” агентлаг мэдээллээ. Ерөнхийлөгч Николас Мадурогийн мэдэгдсэнээр, иргэдийн худалдан авч буй хүнсний нормыг хянахын тулд ийнхүү хурууны хээ уншигч машин байрлуулж байгаа гэнэ.
Венесуэлийн экспортын орлогын бараг 95 хувийг бүрдүүлдэг газрын тосны үнэ дэлхийн зах зээл дээр огцом унасны улмаас тус улсад өргөн хэрэглээний бараа бүтээгдэхүүний хомсдол үүсээд байгаа билээ. Тус улсад тахиа, элсэн чихэр, эм болон бусад хэрэгцээт бүтээгдэхүүнийг худалдаж авахын тулд хэдэн цагаар урт дараалалд зогсдог болоод байна.
Үүний зэрэгцээ томоохон супермаркет, эмийн сангийн эзэд хамтран зохиомлоор үнийн хөөрөгдөл үүсгэх явдал нэлээдгүй гарч байгаа гэнэ. Тиймээс тус улсын эрх баригчид худалдан авагчид болоод супермаркетуудын үйл ажиллагааг хянах зорилгоор дээрх алхмуудыг хэрэгжүүлж эхлээд байгаа юм.
О.Мөнхдуулга
