“Босоо хөх Монгол” хөдөлгөөний залуус, дэмжигчид өнгөрсөн амралтын өдөр “Бурхан халдун” ууланд явж байхдаа тэнд аялж, явсан хэсэг залууст эр бяраа гаргасан талаарх видео бичлэг цахим ертөнцөөр тарсан. Тэгвэл энэ талаар улсын харцага Г.Ганхуяг өөрийн фэйсбүүк хуудастаа бичжээ. Тэрбээр “Өвөр монголчууд “Дунд овоо” дээр гарчихсан явсантай тааралдаж “Ах дүү монголчууд ч Монгол Улсын иргэн биш болохоор Босго тэнгэрээс цааш нэвтрэх эрхгүй” гэж сануулан тайлбарлаж өглөө. Дагуулж явсан монгол хүнийг сэгсийтэл нь ганц алгадаж ойлгууллаа” гэжээ. Энэ үйлдлийг хууль ёсонд нийцэх эсэхийг ЦЕГ-ын хэвлэл мэдээллийн төвийн ахмад Ё.Лхагвасүрэнгээс тодруулахад “Энэ үйлдэл Хэнтий аймгийн нутаг дэвсгэрт болсон. Ер нь Монгол Улсад мөрдөж байгаа хуулиар гадаадын ч бай, дотоодын ч бай иргэний эрхийг зөрчсөн бол хариуцлага хүлээлгэдэг. Гадаадын иргэний эрх зөрчсөн учраас цагдаагийн байгууллага тоохгүй байна гэж ойлгож болохгүй. Тэр хүмүүсийг шалгаж байгаа. Хариуцсан байцаагч нь эзгүй учраас тодорхой мэдээлэл алга” гэв. Монгол Улсын Эрүүгийн хуульд “Бусдыг илтэд үл хүндэтгэн хүч хэрэглэх буюу хүч хэрэглэхээр заналхийлсэн, үүнийг бүлэглэж үйлдсэн бол Эрүүгийн хуулийн 181 дүгээр зүйлд зааснаар 3-5 жил хүртэл хугацаагаар хорих ялаар шийтгэнэ гэсэн заалт байдаг билээ.
С.ХОРЛОО

Эх сурвалж: Unen.mn