С.Зориг агсны хөшөөнд цэцэг өргөж, хүндэтгэл үзүүлэх ёслол боллоо. Жил бүр түүний хөшөөнд төрсөн өдөр болон бусдын гарт зэрлэгээр хөнөөгдсөн өдрийг нь тохиолдуулан журмын нөхөд, ар гэрийнхэн нь цэцэг өргөж буй. Энэ удаа ч мөн АН, МоАХ-ныхон С.Зориг агсны хөшөөнд мэхийн ёслов. Гэвч түүний амийг бүрэлгэсэн этгээдийг олж илрүүлж чадсангүй. Харин тэрхүү гунигт өдөр, аймшигт цаг мөчийг нөхөд нь сэтгэлдээ тээсээр яваа ажээ. Ерөөсөө мартах аргагүй юм чинь дээ. Иймээс уг хэргийн зарим ноцтой баримтуудаас энд товч өгүүлье.
1998 оны 10-р сарын 2-ны шөнө. Хэргийн газарт буюу С.Зориг агсны гэрт тэр шөнө маш олон хүн явж орсон байдаг. Талийгаачийн цогцос дээгүүр харайгаад л гүйж ороод байсан гэдэг. Энэ нь мөрдөн шалгах ажиллагаанд сөргөөр нөлөөлөх ноцтой алдаа байлаа. Цагдаагийн хурандаа нар, ялангуяа тэнд очсон хурандаа Мөрөн нар хүмүүсийн хөл хөдөлгөөнийг хорьж, хэргийн газарт журам дэглэм тогтоогоогүй юм. Магадгүй хэргийн ул мөрийг баллахад хэн нэг нь тэднийг ийнхүү залж чиглүүлсэн ч юм билүү, хэн мэдлээ. Өнөөдөр бид ингэж хардахаас өөр яах ч билээ.
Хэргийн газарт анх очиж н.Булганаас байцаалт авч, үзлэг хийсэн цагдаагийн хошууч усанд осолдсон. Түүний энэ үхэл тун сэжигтэй гэдгийг олон хүн хэлдэг юм.
Хэргийн газраас гарч зугтаасан хоёр алуурчин байшингийн гадаа гүйж явахыг хараад нэгийг нь таньсан төдийгүй “Болдоо” гэж нэрээр нь дуудсан нэгэн буюу маш чухал гэрч нь ч мөн учир битүүлгээр сураг алдарсан хэвээр байна. Түүнийг дуудахад нэг алуурчин нь эргэж харсан тухай яриа л үлджээ.
Тэрхүү хоёр алуурчинг С.Зоригийн гэрээс гараад шатаар санд мэнд уруудан гүйхийг харсан хоёр залуугийн нэг нь бусдын гарт тамлагдаж нас барсан гэдэг. Гэрийнхэн нь энэ талаар ямар ч мэдээлэл өгдөггүй. Ар гэрийнхэн нь сэтгэл санааны хүнд дарамтад байгаа бололтой. Талийгаач залуу харин амьд сэрүүндээ “Энэ хэргийн бүх учрыг Булган л мэднэ” гэж байсан бөгөөд гэрийнхэн нь ч энэ бодлынхоо золиос болсон байж болзошгүй гэдгийг санаандгүй хэлсэн байдаг ажээ.
Түүнчлэн хэргийг хянаж байсан прокурор н.Дарийжав учир битүүлгээр амиа алдсан байна. Мөн хэргийн зарим баримтууд, шинжилгээнд авсан талийгаачийн үс зэрэг нь техникийн шаардлага хангахгүй, зарим нь алга болсон гэх мэдээлэл ч бас бий. Энэ бүхэн тохиолдол байв уу, эсвэл хэргийн ул мөрийг бүрмөсөн баллах оролдлого уу. Ямартай ч хэрэг илэрсэнгүй. Хэзээ ил болохыг бүү мэд. Хөшөө рүү цувах журамт нөхдийнх нь цуваа харин үл тасрах ажээ.
Б.Отгонбаяр
Эх сурвалж: Tumen.mn
