“Сант марал” судалгааны байгууллага саяхан нийгэм, улс төр, эдийн засгийн байдалд хийсэн судалгааны дүнгээ нэгтгэн гаргажээ. Олон асуудлыг хамарсан тун сонирхолтой судалгаа  болсон байна. Судалгаанд 1200 хүн хамрагджээ. “Хэрвээ маргааш сонгууль болвол...” хэмээн сонжиж асуусан асуултын хариултуудыг хот, хөдөөгөөр ангилан харвал нэлээд бодитой мэт санагдана.

Маргааш УИХ-ын сонгууль болвол та аль намын төлөө саналаа өгөх вэ гэсэн асуултанд хөдөөгийнхний 25.4 хувь нь МАН-д, 17.4 хувь нь АН-д, 8.3 хувь нь МАХН-д, 2.0 хувь нь ИЗНН-д гэсэн бол хотынхноос 16.2 хувь нь МАН-д, 19.6 хувь нь АН-д, 13.6 хувь нь МАХН-д 3.0 хувь нь ИЗНН-д саналаа өгнө гэжээ. Нийт дүнгээрээ МАН-ыг гэсэн  нь 38.9 хувьтай бол АН-ыг сонгох нь 33.0 хувьтай байна.  Өөрөөр хэлбэл, МАН-ын нэр хүнд АН-ынхаас бага зэрэг ахисан дүн гарчээ. Гэхдээ “Зөв чигээр замнаж байна уу, буруу тийшээ зүтгэж байна уу” гэдэг асуултын хариултанд оролцогчдын 39.2 хувь нь МАН-ыг “буруу тийшээ зүтгээд байна” гэжээ. Мөн энэ асуултанд 51 хувь нь АН-ыг “буруу тийш зүтгэж байна” гэсэн байлаа. Энэ хоёр том намыг  иргэд  таагүй үнэлж буй аж.

 Топ 10 улс төрчийг нэрлэсэн байдал ч бас анхаарал татаж байна. Энд С.Ганбаатар гишүүн 36 хувиар тэргүүлж, Н.Энхбаяр 16.3 хувиар хоёрт бичигджээ. Тэдний араас  Х.Баттулга 15.5 хувь, Ц.Элбэгдорж 9.6 хувь, Г.Уянга 8.8 хувь, Э.Бат-Үүл 6.9 хувь, С.Жавхлан 6.7 хувь, Б.Эрдэнэ 5.3 хувь, Ц.Даваасүрэн 5.1 хувь, Р.Амаржаргал 3.7 хувиар удаалжээ. Энэ бол зөвхөн нийслэл хотод авсан судалгааны дүн. Харин хөдөөд бас л С.Ганбаатар, Н.Энхбаяр нар Топ-10-т тэргүүлж, Г.Уянга гуравт бичигдсэн байна.

Б.Баяр 

Эх сурвалж: Tumen.mn