“Эрдэнэс Таван толгой” компанийн гүйцэтгэх захирал асан Я.Батсуурь хорих 461 дүгээр ангиас АН-ын  удирдлагууддаа захидал илгээжээ. Э.Бат-Үүл, Р.Гончигдорж нарын  дээр бичсэн түүний энэхүү захидалд “...Миний бие Говь Повер компанитай хамаарах асуудлаар яллагдагчаар татагдан... 45 хоног хоригдож байна. ...Эрдэнэс Таван толгой компани болон Говь Повер компанийн хоорондох маргааныг миний бие тухайн үед шүүхээр шийдүүлж, энэ компанийн тоног төхөөрөмжийг Шүүхийн шинжилгээний үндэсний төвөөр үнэлүүлж, Шүүхийн шийдвэр гүйцэтгэлийн журмаар шилжүүлж авсан юм. Гэтэл АТГ-аас намайг дээрх шүүхээр шийдвэрлэсэн асуудалтай холбогдуулан цагдан хорьж шалгаж байна. Би энэ асуудлыг хуулийн дагуу шийдвэрлэсэн бөгөөд ямар нэг хууль бус үйлдэл хийж, гэмт хэрэг үйлдээгүй гэдэгтээ итгэлтэй байгаа. ...хилс хэрэгт гүтгэгдэн шоронд сууж байгаадаа туйлын гомдолтой байна. ...эрүүл мэндийн доголдол үүсч, амь нас минь эрсдэлтэй тулгараад байна. ...батлан даалтанд гаран  шалгуулах боломжийг олгоно уу...” гэх зэргийг бичжээ. Тэрбээр урьд нь таван удаа батлан даалтанд гарах хүсэлт өгсөн боловч шийдэж өгөөгүй аж. Түүний энэ захидлыг  УИХ дахь АН-ын бүлгийн гишүүд хүлээн авч ярилцаад Р.Гончигдоржоор ахлуулсан ажлын хэсгийг томилж уг асуудлуудад хяналт тавих, ардчиллын төлөө насаараа зүтгэсэн Я.Батсуурь үнэхээр гэм буруугүй бол  эрх ашгийг нь тууштай хамгаалж, цагаатгуулах хүртэл ажиллахыг зарим гишүүд нь санал болгосон байна.

Б.Баяр 

Эх сурвалж: Tumen.mn