Зүүн гурван аймгийг хамарсан түймэр олон га газрыг сүйтгэж гамшгийн хэмжээнд хүрээд байгаа бөгөөд одоог хүртэл галыг зогсоож чадахгүй байна. Түмэнцогт сумд гарсан түймэр цурманд орсон ч цаг агаар, салхины хурдаас болж дахин дэгдэж, сумын ойр орчмыг хар үнсэн тал болтол хуйхалсан гэж Онцгой байдлын ерөнхий газраас мэдээлсэн. Түмэрт өртсөн нутгийн иргэд их хэмжээний хохирол амсаад байгаа бөгөөд олон айл шатаж, хэдэн мянган мал галд өртөж шатаж үгүй болсон. Хүнд цаг үеийг туулж байгаа нутгийн иргэдэд тусламжийн гараа сунгахаар сайн дурынхан мөнгө хандивлаж буй. Тэгвэл “Хамаг Монгол” төслийн МУГЖ С.Жавхлан тэргүүтэй хэсэг хүмүүс түймэртэй тэмцэж байгаа нутгийн иргэдэд туслахаар замдаа гарчээ. Тэдний мэдээлж байгаагаар аймгийн 50 гаруй хувь шатаж өтгөн хар утаанаас өөр зүйлгүй болсон байна гэв. Өдрийн цагаар тус аймгийн үзэгдэх орчин харанхуй, шатсан өвс ургамал, модны үртэс салхиар туугдан энд тэндгүй хөглөрч, амьсгалахын аргагүй орчинд нутгийн иргэд амьдарч байна хэмээлээ.
Тиймээс МУГЖ С.Жавхлан тэргүүтэй “Хамаг Монгол” төслийнхөн түймэрт автсан нутгийн галыг зогсоох үйл ажилгаанд гар бие оролцохоор явжээ.
Эх сурвалж: Шуурхай.мн
