Үдийн цай хөтөлбөрийн хэрэгжилтэд нийслэлээс шалгалт хийлээ. НИТХ-ын Эрүүл мэнд, хүнсний аюулгүй байдлыг хангах асуудал эрхэлсэн дэд хорооны дарга НИТХ-ын төлөөлөгч Ж.Амарсанаа, НМХГ, Нийслэлийн эрүүл мэндийн газар, Нийгмийн эрүүл мэндийн хүрээлэнгийн мэргэжилтнүүдээс бүрдсэн байцаагчид Нийслэлийн ерөнхий боловсролын нэгдүгээр сургууль болон 79 дүгээр сургуулийн үдийн цайны хэрэгжилтийг шалгасан байна. Шалгалтаар нэгдүгээр сургуулийн цайны газарт хэт чихэрлэг амттан, хийжүүлсэн энергийн ундаа худалдаалж байсан нь Эрүүл мэндийн сайдын тушаалыг зөрчсөн үйлдэл болжээ. Харин сургуулиуд үдийн цай хөтөлбөрийг үдийн хоол болгон хэрэгжүүлж байгаа нь учир дутагдалтай гэдгийг албаныхан хэлж байлаа. Учир нь нийслэлд үйл ажиллагаа явуулдаг 200 орчим Ерөнхий боловсролын сургуулийн цайны газрууд нь зориулалтын бус стандартын шаардлага хангаагүй нөхцөлд ажилладаг аж. Ийм эрсдэлтэй нөхцөлд бага насны сурагчдад хоол бэлтгэж өгөх нь тохиромжгүй гэдгийг мэргэжлийн байгуулага хэлж байна.
Засгийн газраас нэг сурагчийн үдийн цайг 600 төгрөгт багтаахаар тооцож олгодог. Гэвч энэ мөнгө нь хүүхдийн авбал зохих илчлэгт хүрэхгүй байгааг сургуулийн удирдлагууд албаны хүмүүст учирласан байна. 1-р сургуулийн хувьд энэ мөнгөн дүнгээр нэг хүүхдэд 266,8 ккал илчлэг бүхий хоол өгдөг гэнэ. Энэ нь авбал зохих илчлэгийн хэмжээнээс бага үзүүлэлт гэдгийг албаныхан онцолжээ.
НИТХ-ын төлөөлөгч, Эрүүл мэнд Хүнсний аюулгүй байдлыг хангах дэд хорооны дарга Ж.Амарсанаа “Эцэг эхчүүд хүүхдүүдээ сургуульдаа ямар хоол унд идэж байгаад анхаарал тавьдаггүй. Сургуульд нь даатгаад үлдээдэг. Иймээс тухайн сургууль сурагчдийн хоол тэжээлээс гадна эрүүл мэндийн байдалд нь үүрэг хариуцлага хүлээн ажиллах ёстой. Хүүхэд өвдөх хоолны хордлогод орвол яах вэ гэдэг эрсдэлийг үргэлж бодож ажиллах хэрэгтэй. Тухайлбал бидний шалгалт хийсэн цайны газрын тогооч нар хоол бэлтгэхдээ зориулалтын бээлийгүй, түргэн мууддаг зарим хүнсний бүтээгдэхүүний хадгалалтын дэглэм зөрчсөн байна. Мөн бага ангийн сурагчдад хэт чихэрлэг бүтээгдэхүүн, энергийн ундаа худалдаалж буй нь Эрүүл мэндийн сайдын тушаалыг зөрчиж байна” гэлээ.
