Өнгөрсөн оны дөрөвдүгээр сард Багануурын зам дээр зорчигч тээврийн автобус онхолдож дөрвөн хүн гэмтсэн харамсалтай хэрэг гарсан юм. Багануур дүүргийн эрүүгийн хэргийн анхан шатны шүүх энэ хэрэгт Э.Сүрэндулам гэдэг эмэгтэйг холбогдуулан яллажээ. Зорчигч тээврийн автобус нь бүрэн бус техник байсныг зорчигч тээврийн “Тээвэр-Ачлал” компанийн зохицууулагч Э.Сүрэндулам  шалгаагүй гэсэн шалтгаанаар хоёр жилийн хорих ял оноосон байна. Гэтэл Э.Сүрэндулам тэр өдөр Өвөрхангай аймагт амьдарч байсан хамаатных нь хүн нас барж, ажлаасаа чөлөө авч явсан байжээ. Өөрөөр хэлбэл, тэр зорчигч тээврийн автобусаа замд гарахад шалгах үүрэгт ажлаа өөр хүнд хариуцуулан Өвөрхангай руу явсан байв. Түүний оронд ажил хариуцаж үлдсэн хүн нь тус компанийн менежер Н.Батноргай гэдэг хүн юмсанж. Гэвч мөрдөн байцаагч, прокурорууд  асуудлыг Н.Батноргайтай ярьж, түүнийг мөрдөн шалгасангүй. Зөвхөн ажлаас чөлөөлөгдөөд гачигдлаар Өвөрхангай аймагт явж байсан Э.Сүрэндуламтай “тооцоо” бодож, эрүүгийн хариуцлага үүрүүлэх болсон нь тун сонин. Э.Сүрэндулам нь гачигдлаар явж, тэр өглөө ажил дээрээ байхгүй байсан тухайгаа хангалттай баримтаар нотолсон боловч мөрдөн байцаагч Ууганбаяр, хяналтын прокурор Ж.Бүрэнжаргал нар нь  тэс өөр, дутуу зэрэмдэг, хуурамч баримтуудыг үндэслэн яллах дүгнэлттэйгээр шүүх рүү шилжүүлэхэд шүүгч нар нь ч бас нарийн нягт хяналгүй дээрх шийдвэрийг гаргасанд ар гэрийнхэн нь гомдолтой байгаа ажээ. Энд бас нэг сонирхол татаж буй зүйл нь зорчигч тээврийн автобусыг замд гарахад олгодог замын хуудас дээр нь Э.Сүрэндуламын гарын үсэг  байсан бөгөөд үүнийг тэр өөрөө “Энэ миний гарын үсэг биш. Хуурамч баримтуудыг бүгдийг шалгуулна” гэсэн байв. Гэтэл мөрдөн байцаагч, прокурор, шүүгч нар Э.Сүрэндуламын гомдол хүсэлтүүдийг  огт хайхарч үзсэнгүй. Ийнхүү Э.Сүрэндулам хилсээр ял сонссон байна.

Б.Баяр  

Эх сурвалж: Tumen.mn