Хамтлагийн уран бүтээлээ хэдийнэ завсарласан ч гэлээ, “Сүнс”-ийн залуус тус бүртээ өөрсдийн гэсэн бизне эрхэлж яваа. Харин тус хамтлагийн ахлагч Б.Лхагвасүрэн өдгөө “Max family” студиэ ажиллуулахын зэрэгцээ “Дуу бичлэг бүтээгчдийн үндэсний төв”-ийн тэргүүнээр ажиллаж байгаа аж. Рок попын ертөнцөд өөрсдийн залгамж халааг бэлтгэн, шинэ залуу хамтлаг дуучдыг дэмжиж ажилладаг тэрбээр уран бүтээлчдийнхээ оюуны өмчийг хамгаалах тал дээр багагүй зүйл хийсэн гэдэг.

Энэ тухайгаа нэгэн ярилцлагадаа дурдаж “Дуу болон клип хулгайлдаг хүмүүс шинэ уран бүтээл хийж чадахгүй байгаа юм бол хоёроос гурван жилдээ уран бүтээлдээ pause авчих хэрэгтэй. Найрын дугараа шиг жилдээ заавал арван дуу хийх ёстой гээд хулгайн бүтээлээр нэрээ баастаж, чадан ядан ганц CD гаргаж байх нь зөв ч юм уу, буруу ч юм уу. Ер нь барууны болон Азийн том одууд гурван жил завсарлаж байгаад нэг CD хийдэг. Селин Дион гэхэд л арван жилд хоёр цомог гаргасан байдаг. Заавал тэг гэж байгаа юм биш л дээ. Гэхдээ Мадонна хэзээ жил болгон цомог гаргаад дуу, клип хулгайлаад байсан юм” хэмээн ний нуугүй өгүүлсэн бөгөөд энэ яриагаараа сүүлийн үед хэл аманд өртөөд байгаа Төрийн соёрхолт дуучин Д.Болдыг хальт “чимхээд” авчээ.

Үүгээр ч зогсохгүй, арваад жилийн турш монголын рок попын уран бүтээлчидтэй сүжирч явсан хөгжмийн найруулагч Рагу Раманыг хүртэл шүүмжилжээ. “Энэ хүн “Би”-гээр өвчилсөн хүн үү, аль эсвэл урлагийнхан маань түүнийг эвдчихэв үү гэдгийг бодох л хэрэгтэй. Би нэг хоёр удаа тааралдаж байсан болохоор хувь хүнийх нь тухайд мэдэхгүй байна. Надтай тааралдах бүртээ Монгол охидтой явж байдагт нь үнэхээр дургүйцэж байсан. Яагаад тэр Монгол охидыг хольж солиод байдаг юм” гэж эгдүүцсэн дуучин залуу өөрийгөө тун ч үндсэрхэг үзэлтэй нэгэн хэмээсэн шүү.

Эх сурвалж: Photonews.mn