Авлигатай тэмцэх газраас эрүүгийн хэрэг үүсгэн мөрдөн байцаалтын ажиллагаа явуулж, тухайн гэмт хэрэг гарахад нөлөөлсөн шалтгаан, нөхцөлийг арилгах чиглэлээр нийслэлийн Баянгол дүүргийн Татварын хэлтсийн дарга Р.Мөнх-Эрдэнэд Мөрдөн байцаагчийн мэдэгдэл хүргүүлэв.Б нь нийслэлийн Баянгол дүүргийн Татварын хэлтсийн Мэдээлэл боловсруулалт статистикийн тасгийн даргаар ажиллаж байхдаа албан тушаалынхаа байдлыг урвуулан эхнэр Х-ын үүсгэн байгуулсан аж ахуйн нэгж болон нэр бүхий компанийн дансанд Баянгол дүүргийн Татварын хэлтсийн татварын данснаас 2010 оны 2 дугаар сард 39 сая, 2010 оны 11 дүгээр сард 15 сая, 2011 оны 2 дугаар сард 39 сая, 2009 оны 11 дүгээр сард найз П-ийн дансанд 37 сая төгрөгийг тус тус шилжүүлэн авч, завшин улсын төсөвт онц их хэмжээний хохирол учруулсан байна.
Түүнчлэн 2010 оны 3 дугаар сард нэр бүхий компаниас албан тушаалын байдлаа ашиглан бусдыг хуурч мэхлэх замаар 25.5 сая төгрөгийг эхнэрийнхээ нэр дээрх аж ахуйн нэгжид шилжүүлэн авч, татварын өргүй гэх хуурамч албан бичгийг хийн өгч, их хэмжээний хохирол учруулсан болох нь мөрдөн байцаалтын явцад тогтоогдов. Дээрх гэмт хэргийг гарахад хэд хэдэн шалтгаан, нөхцөл нөлөөлсөн гэж Авлигатай тэмцэх газрын мөрдөн байцаагч үзсэн байна. Тухайлбал, Баянгол дүүргийн Татварын хэлтэс нь аж ахуйн нэгж, байгууллага, иргэдээс ирж буй албан бичиг, хүсэлтийг нэг бүрчлэн бүртгэдэггүй, хэлтсийн удирдлага, тасгийн дарга нарын байнгын хяналт шалгалт хангалтгүй, албан хаагч ямар материал хүлээн авч шийдвэрлэж байгаа талаар мэддэггүй, татварын програмд нэмэлт мэдээлэл засвар оруулах эрх бүхий албан тушаалтан нь аж ахуйн нэгжийн татвар төлөлтийн талаар худал мэдээ, мэдээлэл оруулдаг, татварын илүү төлөлттэй аж ахуйн нэгжийн илүү төлөлтийг татвар төлөх гэж буй өөр аж ахуйн нэгжийн татварт суутгаж тооцдог зэрэг зөрчил, дутагдал байна.
Иймээс дээрх гэмт хэрэг үйлдэгдэхэд нөлөөлсөн шалтгаан, нөхцөлийг арилгах чиглэлээр холбогдох арга хэмжээг авч, хуульд заасан хугацааны дотор хариу ирүүлэхийг нийслэлийн Баянгол дүүргийн Татварын хэлтсийн дарга Р.Мөнх-Эрдэнэд мэдэгдлээ.Эрүүгийн байцаан шийтгэх хуулийн 190 дүгээр зүйл, Гэмт хэргээс урьдчилан сэргийлэх тухай хуулийн 9 дүгээр зүйлд заасны дагуу мөрдөн байцаагчийн мэдэгдэл хүлээн авсан байгууллага, албан тушаалтан нь шаардлагатай арга хэмжээг авч, нэг сарын дотор хариу мэдэгдэх үүрэгтэй юм.
ЭХ СУРВАЛЖ : TIMES.MN
