Зангарагтэй эр хүн гэж хэнийг хэлэх вэ? Зарим нэг хүн найранд гурван дуутай, наадамд гурван даваатай, нанчилдаан болоход гурван нөхрийн шүдийг цөм нухаастай хүнийг жинхэнэ зангарагтай эр хүн гэнэ гээд дор бүрнээ олон янзаар тодорхойлох биз.
Тэдгээрийн дотор оюутнууд бол царай зүс сайтай сургуулийнхаа сор болсон охиныг найрснаар нэгнийгээ зангарагтай эр хэмээн нэрлэж байж ч болох юм. Тэгвэл олны толгойг эргүүлсэн эл асуултад хариулт эрэхээр "Sky pyramid" студийн уран бүтээлчид ажилласан байна.
Тодруулбал, тэд өнгөрсөн хугацаанд "Зангараг" хэмээх бүрэн хэмжээний уран сайхны кинон дээр ажиллаж өнөө цагт алдагдаад байгаа эр хүний жудаг, мөс чанар, аминаас уяатай нандин хэлхээс, ээдрээт зангилаанд алдуураагүй тэсвэр тэвчээр бүхнээр "Зангараг" гэж чухам юу вэ гэдгийг уран сайхны аргаар тун чадмаг харуулжээ.
Олны анхаарлыг ихэд татаж буй тус кино зохиолыг А.Батбаатар бичиж, ерөнхий найруулагчаар нь ажилласан бол гол дүрүүдэд Төрийн соёрхолт, Ардын жүжигчин Ц.Төмөрбаатар, МУГЖ Ц.Төмөрхуяг, МУСТА Д.Бямбацогт, Г.Золбоот, Д.Дэлгэрсайхан, П.Баттөр, Г.Алтангэрэл, жүжигчин Е.Баярмагнай, Н.Мөнхсоёл нар тоглосон.
Монголын кино урлагийн шавыг тавилцсан гэх Монгол улсын Ардын жүжигчин Цагааны Цэгмид гуайн үргэлжлэл, гурван үеийн түүчээ, үр хойч нь тус кинонд дүр бүтээсэн нь уг киноны онцлог болж чаджээ.Мөн чадварлаг жүжигчин гэдгээ сүүлийн үед олонтаа батлан харуулаад байгаа М.Мөнх-Эрдэнэ буюу реппер Gee уг кинонд туслах дүрийг бүтээжээ.
Тэгвэл адал явдалт, уянгын драмын төрлийн “Зангараг” уран сайхны кино ирэх зургадугаар сарын 10-нд Тэнгис, Өргөө, Соёмбо, Хүннү Моллын кино театруудад зэрэг нээлтээ хийхээр болсон төдийгүй Зайсангийн аманд шинээр нээгдэж буй "Гэгээнтэн" кино театр ч уг киногоор нээлтээ хийхээр болсон аж. Тиймээс "Зангараг" УСК үзэгчдийн болоод кино театруудад ч хамгийн их хүлээлт үүсгээд байгаа дэлгэцийн бүтээлээр нэрлэгдээд байна.
Дашрамд дурдахад, тус киноны уран бүтээлчид Олон улсын хүүхдийн эрхийг хамгаалах өдрийг угтан өнөөдөр хотоос зайдуу гэр хорооллын 150 гаруй хүүхдийг баярлуулж, бэлэг тарааж байгаа гэнэ.
Б.Хишигдэлгэр
