Нийслэлийн Иргэдийн төлөөлөгчдийн хурлын тэргүүлэгчид улсын мөнгөөр гадаадад зугаалсан талаарх бас нэгэн баримт дэлгэгдлээ. Өнгөрсөн жил НИТХ-ын 18 төлөөлөгч төсвийн мөнгөөр Бразил явж хөлбөмбөгийн ДАШТ үзээд ирсэн. Бразилд хурлын үйл ажиллагааны туршлага судална гэсэн нэрийн дор явсан тэдний нийт зардал 183,6 сая төгрөг болсон гэдэг. Тэдний Бразил явж гарлагдсан мөнгийг нь өөрсдөөс нь гаргуулна гэж УИХ-ын дарга З.Энхболд мэдэгдсэн ч уг асуудал чухам яаж шийдэгдсэн нь одоог хүртэл тодорхойгүй.
Тэгвэл дээрхтэй адил баримт саяхан олон нийтэд ил болов. Тодруулбал, НИТХ-ын 12 төлөөлөгч 2013 оны 12 сарын 7-14-ны хооронд АНУ-ын Вашингтон, Нью-Йорк, Лас-Вегас, Лос Анжелес зэрэг хотуудад суралцангаа аялана гэх нэрийн дор 7 өдөр зугаалж, далайн эрэг дээр тарвалзаж байгаад иржээ. Тэд “study tour” буюу суралцангаа аялна гэх үгээр өөрсдийн тансаглалыг халхалсан ч хөтөлбөрт нь ганц ч сурах, суралцах гэсэн өгүүлбэр байхгүй байгаа нь гайхалтай. Ядаж л АНУ-ын нэг мужийн захиргааны үйл ажиллагаатай танилцсан талаарх мэдээлэл харагдахгүй байгаа юм. Тэдний зугаалсан баримт хоёр жил хав дарагдсан байна. АНУ-аар зугаалах аялалд Хотын даргын одоогийн орлогч Ц.Энхцэнгэл /2013 онд НИТХ-ын төлөөлөгч байсан/, НИТХ-ын төлөөлөгч Д.Энхсайхан, Л.Нарантуяа, Ц.Одонтунгалаг, Т.Бат-Эрдэнэ, /одоо хотын даргын орлогч/ Ш.Одгэрэл, С.Ононбаяр, Л.Шагдаррагчаа, Д.Батбаяр, М.Халтар, С.Оюунгэрэл, Д.Цэрэннадмид гэх хүмүүс багтжээ.Эдгээр 12 хүний зөвхөн нэгнийх нь зардал 3300 доллар болсон байна. Тухайн үед доллар 1410 төгрөгтэй тэнцэж байсан бөгөөд нэг хүн 4 сая 653 мянган төгрөгөөр аялсан гэсэн үг.Харин 12 хүн нийт 55 сая 836 мянган төгрөгөөр яваад ирсэн байх нь.
Улс орны эдийн засаг хямарч иргэдийн амьжиргаа орлого хүндэрч улсын төсөв хэдэн зуун тэрбумаар тасарч байхад нийслэлийн иргэдийн итгэлийг олж сонгогдсон тэргүүлэгчид татвар төлөгчдийн мөнгөөр дэлхийн тансаг хотуудад зугаалсанд олон нийт дургүйцэж байна. Үүнээс өмнө. Дарханы ИТХ улсын төсвийн хөрөнгөөр Дубай руу зугаалсныг аудитын газраас шалгаад хариуцлага тооцож байсан удаатай. Бразил руу зугаалсан нөхдийн хэрэг ч мөн намжаагүй байгаа. Мөн зарим аймгийн ИТХ-ын төлөөлөгчид гадаадад зугаалсан гэх баримтууд хэвлэлээр гарч байсан. Харин энэ удаад дээрх баримт олон нийтэд илж болно. Холбогдох хүмүүс уг асуудалд хэрхэн хариуцлага тооцох нь олон хүний анхаарлыг татаж байна.
Ер нь татварын төлөгчдийн мөнгийг ийнхүү дураараа үрэлгэн зарцуулдаг байдлыг хэзээ таслан зогсоох вэ Д.Баттулга дарга аа.
Т.Энхэлээ
Эх сурвалж: 24 tsag.mn
