“Кен хүүхэлдэйн дүрд тоглож олны өмнө гарах бүртээ 15 мянган ам.доллар олдог байсан 20-хон настай залуу энэ сарын 3-нд нас барсан мэдээг саяхан уншаад өнгөрч билээ. Түүнд хэчнээн өндөр зэрэглэлийн эмнэлэг, эмч нар ч тус болсонгүй. Түүний нэрд гарсан богинохон түүх нь 45 мянган ам.доллар байсан ч үүнийгээ олон дахин “нугалж” орлого олж чадсан ч ДОХ өвчнөөр амиа алдсан гэлцэх болов. Тэр үнэхээр дүр шигээ хүүхэлдэй байж, өөрөөр хэлбэл хүн гэдгээ бараг мартсан ажгуу”.
Гэвч тэрбээр сүүлчийн “амьд хүүхэлдэй” байсангүй. Түүний нэгэн адил Кен нэртэй хүүхэлдэй 30 настай Родриго Алвес 20 гаруй удаа гоо сайхны тэс засалд орж, үүндээ 100 гаруй мянган фунт стерлинг зарцуулсан гэдэг. Гэхдээ талийгаач “Кен”-ийг гүйцээгүй тул дахиад мэс засалд орохоос буцахгүй гэдгээ мэдэгджээ.
Монгол залуусаас авууштай нь “Хэзээ ч гадна гадна дүр төрхөөрөө хүүхэлдэй болдоггүй”. Үүнд зарцуулах хэмжээний “тоглох доллартай” хүн ч цөөн.Гэхдээ их хэмжээний мөнгө олохын тулд сэтгэл зүрх, үзэл бодол, нэр төрөө золиослохоос харамсдаггүй “хүүхэлдэй” олон байна.
Хөгжлийн банкны Мөнхбат гүйцэтгэх захирал Н.Мөнхбат гэдэг залуу өмнөх захирлуудын зуурсан бантангийн аягыг цэвэрлэж, “хатуу хэцүү” шүүмжлэл бүхнийг давж чадна гэсээр гэнэтхэн гарч ирсэн. Иргэний зориг, энэ залуугийн тэнэглэлийн алийг бүү мэд, ямартай ч банкны салбарт гойд танигдсан CЕО гэгдэхээргүй тэрбээр магадгүй 160 сая төгрөгийн цалин, тансаг хотхоны таван өрөө байрны төлөө ч ирсэн байж мэдэх юм. Өөрийн гэсэн бизнесийн түүхгүй, УИХ-ын гишүүн Н.Батбаярын туслах асан, Н.Батбаяр, Б.Гарамгайбаатар нарын “хүүхэлдэй” гэгдэх түүнд итгэж хоног тутамд ам.доллараар өндөр хүү төлдөг хамаг хөрөнгөө атгуулсан нь томчуудын тоглоом байсан биз.
Хэзээ нэгэн цагт Хөгжлийн банкны хөрөнгийг буруу зарцуулсан хэргээр буруутлаа гэхэд “сайн ах” нар нь биш тэр өөрөө л “тугдайна”. Тэр, энэ намайг ийм зүйл хийлгэсэн гэж илчлэх нь түүнд аврал болох бус бүлэглэсэн, зохион байгуулалттай үйлдсэн гээд бүр ч хэргийг нь хүндрүүлнэ. “Ах нар”-тайгаа ярилцаад ч нэмэргүй. Тэд “Чамд эрх мэдэл, хэзээ ч хүршгүй тансаг амьдралаар хэсэгхэн хугацаанд жаргуулсанд баярлаж яв” гэнэ.
Хөгжлийн банк хуулийн зөвлөгөө авахдаа 48,6 сая, Вьетнамд томилолтоор ажиллах тийзний зардалд 5.5 сая төгрөг зарцуулсан л гэнэ. Ийгл телевизид 20 орчим сая, Baabar.mn сайтын нийтлэлчдийг худалдаж авахад мөн тэр хэмжээгээр ам.долларын хүүтэй мөнгийг ард түмнээр төлүүлэн байж нэр төрөө хамгаалсан гэж байна. Лав л baabar.mn сайтын нийтлэлчдээс энэ мөнгөнөөс хүртсэн хүн одоогоор олдохгүй байна.
Төмөр зам, автозам, жижиг дунд үйлдвэрлэлийг хөгжүүлэх гээд олон чиглэлд зарцуулсан их хэмжээний мөнгө Хөгжлийн банкинд хамаардаг. Сангийн яам “Чингис” бондын нэг тэрбум 230 сая 100 мянган ам.долларыг Хөгжлийн банкинд шилжүүлсэн. Төгрөгийн ханшаас үүдэн 2014 оны арванхоёрдугаар сарын 31-ний байдлаар 302.6 тэрбум төгрөгийн эрсдэл хүлээх нь гэсэн тооцоо гарч байсан гээд яривал тун эмзэг сандал дээр сууснаа Н.Мөнхбат ухаарахгүй л явна.
Дээрх кэйс дээр л гэхэд тухайн үед Эдийн засгийн хөгжлийн сайд асан Н.Батбаяр “ах нь” түүнийг ямар гээчийн нүхэнд унагасныг ойлгоогүй өндөр албан тушаалд алгаа ташин очиж явчихаж. Ийм жишгээр сэтгэлгээний боолчлолын аргаар амьдарч буй залуус дэндүү олширлоо. Яаж тэднийг боолчлолоос аврах вэ. Бүгдээрээ сайн ах нарын хуруу, хумс болж дээлээ нөмөрсөөр байх уу.
С.Лантуу
Zaluu.com
