Нуухыг нь авах гээд нүдийг нь сохолдог, нэгийг бүтээх гэж нөгөөг сүйтгэдэг толгой нь эргэсэн төрийн балгаар иргэд аж ахуйн нэгж бизнес эрхлэгчид хохирч байна.
Үүний нэгэн жишээ бол Сонгинохайрхан дүүргийн нутаг дэвсгэрт байрлах Авзага Трэйдийн МЧХ Компаны хувийн өмчид төрийн үйл ажиллагааг хэрэгжүүлэхийн тулд ноцтойгоор халдлаа.
Гурвалжингийн гүүрний ойролцоо 10-аад жил үйл ажиллагаа явуулж буй МЧХ-ийн бетон зуурмагийн үйлдвэрийн хашааг нурааж, үйлдвэрийг үйл ажиллагаагаа явуулах боломжгүйд хүргээд байгаа шалтгаан нь үйлдвэрийн эзэмшил бүхий газрыг “Гудамж” төсөлд ашиглах гэнэ. Тус бетон зуурмагийн үйлдвэрийг 3 тэр бум төгрөгийн төслийн зээлийг төрөөс авч байгуулсан бөгөөд барилгын хамгийн чухал үндсэн түүхий эдийг дотооддоо үйлдвэрлэдэг юм байна. Нийслэлийн Засаг Даргын 2008 оны 461 тоот захирамжаар бетон зуурмагийн үйлдвэрийн зориулалтаар МЧХ Компанид олгосны дагуу хууль ёсоор газар эзэмшин үйл ажиллагаагаа явуулж байв.
Хачирхалтай нь төр өөрөө бизнес эрхлэгчдийг дэмжинэ, хийж бүтээ гэж төслийн зээл олгочихоод, бүтээгээд босгочихоор нь өөр нэг төсөл хэрэгжүүлэхийн тулд өмнөхийг нь сүйтгээд эхлэв. Шинээр хэрэгжүүлэх гэж буй “Гудамж” төсөл нь нийслэлийн түгжрэлийг бууруулах, хурдны зам барих зорилготой бөгөөд төслийнхээ хүрээнд эрчим хүчний гудамж, барилгачдын гудамжыг холбосон авто зам тавих ажил эхлэсэн байна. “Дээрээс” тийм шийдвэр захирамж гаргачихаад байхад хэрэгжүүлж эхлэх нь эрх мэдэлгүй доод шатны хүмүүсийн буруу биш. Ард иргэдээ, хувийн хэвшлээ хохьроож буй төр засаг гэх “том толгойтнууд” яахын аргагүй гол буруутан. Ядаж хууль ёсны дагуу эзэмшигчтэй нь тохиролцож, төр өөрөө үйлдвэрийн газрыг эргүүлэн татаж, нөхөн олговор олгож хохирлыг нь барагдуулах ёстой ч холбогдолгүй бичиг баримт үзүүлж, шууд өмчид халдан буулгаж өч төчнөөн сая төгрөгөөр хохироож байгаа нь дэндүү харамсалтай.
Авто зам бүтээн байгуулах нь өндөр ач холбогдолтой нь мэдээж боловч түүнээс ч дутуугүй ач холбогдолтой барилгын үндсэн түүхий эдийг дотооддоо үйлдвэрлэх бетон зуурмаыгийн үйлдвэрийг зогсоож, тэр ч бүү хэл олон хүний амь амьдралаа зориулан байж, өр зээл тавин байж босгосон бүтээн байгуулалтыг шууд нураана гэдэг байж боломгүй үйлдэл. Үйлдвэрийг сүйтгэн байж барьж байгуулах “Гудамж” төслөө хэрэгжүүлж, зам тавих ажилд хүртэл бетон түүхий эд хэрэглэх нь гарцаагүй юм.
3 тэр бумын төгрөг бага мөнгө биш. Хамаг амь амьдралаараа дэнчин тавьж томоохон зээлийг авч, арыг нь дааж бүтээн байгуулалтын ажлыг эхлүүлсэн хүмүүсийн цаг хугацаа, хүч хөдөлмөр, хөрөнгө мөнгөө зарцуулан босгоод үр шимийг нь дөнгөж хүртэж эхлэх болоход нь их хэмжээний хохирол учруулсан энэ мэт бодлогогүй шийдвэр гаргадаг ард иргэдийн “айдас хүрэм” төр засагтай улс орон юуныхаа хөгжил дэвшил ярих билээ.
Эх сурвалж: www.newsline.mn
