Бидний амьдарч буй орчин амар тайван байвал амьдрах таатай орчин гэж үзэж болно. Тэгвэл та бид ийм таатай орчинд амьдарч чадаж байгаа болов уу?

Энэхүү асуултад заавал хариулахыг хичээгээрэй гэж хүсье. Учир нь сүүлийн жилүүдэд гэр бүлийн хүчирхийлэлд ирээдүй болсон хүүхдүүд хамгийн ихээр өртөх болсон. Хүчирхийлэлтэй орчинд өссөн хүүхэд хүчирхийлэгч болон хүмүүждэг хэмээдэг. Дээхэн үед хөрш айлын хүүхэд уйлбал гэртээ оруулж эцэг,эхээс нь бусдаас хамгаалдаг байсан гэж учир мэдэх хүмүүс хуучилдаг.

Гэтэл өдгөө хүний мөс муудсан цаг ирсэн үү! эсхүл бусдын асуудал надад хамаагүй гэж орхих сэтгэлтэй болж хүмүүжих болсон уу?

Ийн асуухын учир нь, гудамжинд хүн хэвтэж байхыг харсан хүмүүс дэргэдүүр нь хээв нэг алхах. Тэр хүн биеийн байдал нь муудаад ухаан алдан унасан ч байж мэдэх. Гэтэл гудамжинд яваа хүмүүс түүнийг архичин хүн согтуудаа унтаж байна гэж сэжиглэн түүнд ойртох ч үгүй зөрөх нь бусдын төлөө гэх сэтгэлгүйг харуулж байгаа нь тод жишээ. Мөн хажуу айлын хүүхэд олон цагаар уйлж байхад "хүүхдээ яагаад уйлуулаад байгаа юм" гээд асуучих тэнхэлгүй хүмүүс. Манай хүүхэд уйлаагүй бол болоо гэсэн шиг дуугүй өнгөрдөг. Ийм л амиа бодож өөрийгөө зөвтгөсөн нийгэмд бид амьдарч байгаа нь үнэн. 

Харин сүүлд нь эцэг нь хүүгээ зодож амийг нь авч гэсэн сэрэмжлүүлэг мэдээ хүргэхэд "Бид чинь одоо ямар нийгэмд амьдраад байна аа" хэмээн халаглан суудаг. Яг одооноос эхлэн иргэний үүргээ ухамсарлан хэн нэгэн гудамжинд хэвтэх, хөршийнхөө хүүхэд, хосууд маргалдан зодолдож буйг мэдэх л юм бол өөрсдөө очдоггүй юм аа гэхэд цагдаагийн байгууллагад мэдээлэл өгчихдөгсэтгэлтэй хүмүүс болцгооё!!!

Энэ он гарсаар л гэхэд гэмт хэргийн халдлагад 400 гаруй хүүхэд өртжээ. Тиймээс гэр бүлийн хүчирхийлэл, ялангуяа хүүхдийн хүчирхийллийг бууруулахаар хэд хэдэн ажлыг хэрэгжүүлж байгаа. Үүний нэг нь гэр бүлийн хүчирхийллийн талаар мэдээлэл өгөх 107 дугаарын утас. Одоогийн  байдлаар 107 утсанд 900 орчим иргэн эрхзүйн болон сэтгэлзүйн зөвлөгөө авахаар ханджээ. Үүний дийлэнх нь 80 хувь нь нийслэлээс холбогдсон байна.

Уг утасны давуу тал нь "Мэргэшсэн баг ажиллаж байгаа юм. Энэ нь сэтгүүл зүйн болон нийгмийн ажилтан, эмч нар хамтран ажиллаж шууд зөвлөгөө өгдөг. Хамтарсан баг нь тухайн хүнд тулгарсан асуудлыг шийднэ гэсэн үг. Хэрвээ ямар нэгэн байдлаар эрх ашиг нь хохирсон, цагдаагийн байгууллагын хамгаалалт хэрэгтэй бол 107 дугаарын утсанд холбогдох боломжтой" гэдгийг Улаанбаатар хотын цагдаагийн газрын хэлтсийн дарга, хошууч П.Эрдэнэцэцэг хэллээ.

Мөн тэрбээр хөршийн хамгаалалтын асуудлаар цагдаагийн байгууллагаас "хөршийн хяналт" гэсэн журмыг боловсруулж байгаа. Гаднын улс орнуудын цагдаагийн байгууллага хамгийн түрүүнд мэдээллээр хурдан шуурхай хангагддаг. Тиймээс иргэдийнхээ эрхийг сайн хамгаалж чаддаг. Хөршийн хяналт журам хэрэгжиж эхлэхээр гэр бүлийн хүчирхийллийн дарамтад мөн архидан согтуурдаг хүний дэргэдэх хүмүүсийг нь энэ дарамтад байдгийг нь мэддэг бол иргэд шууд цагдаагийн байгууллагад мэдээлдэг болох юм гэдгийг онцгойлон хүргэв.

Энэ оны тавдугаар сарын байдлаар гэр бүлийн хүчирхийллийн улмаас үйлдэгдсэн 487 гэмт хэрэг бүртгэгджээ. Энэ нь өмнөх оны мөн үеийнхээс 185 хэрэг буюу 61.3 хувиар өссөн байна. Үүнээс гэмт хэргийн халдлагад өртсөн 400 гаруй хүүхдийн 49 нь эрүүл мэнд, бие махбодоороо хохирчээ. Харин тав нь хүчиндүүлсэн, 22 нь танхай нь гэмт хэргийн золиос болсон нь харамсалтай.

 Ийн харамсаж суухгүй нь тулд ирээдүйнхээ төлөө хамтдаа алхана гэдэгтэй итгэлтэй байна.

Х.Даваа