Дөрөвхөн настай бяцхан охин харгис хэрцгий төрсөн эцэг, хойд эхийнхээ гарт зодуулж харамсалтайгаар амиа алдсан аймшигт хэрэг өнгөрсөн оны хоёрдугаар сарын 21-ний өдөр гарсан. Ээж, аавынхаа хайранд өсч, эрхэлж нялхрах насандаа томчуудын “тэнэг″ үйлдлээс болж биендээ даамгүй хүнд нөхцөлд тарчилсаар энэ хорвоог орхисон нь олон нийтийг бухимдуулж буй. Эл хэргийн сэжигтнүүд болох төрсөн эцэг Т.Цогт, Г.Маралмаа нарын хэргийг шүүх хурал одоо ШШГЕГ-ын харьяа цагдан хорих 461 дүгээр ангид үргэлжилсээр байна. Сэжигтнүүд  бие биенийхээ эсрэг мэдүүлэг өгч эхэлжээ. Тэрээр шүүх хурлын үеэр талийгаач охины эцэг Т.Цогт хэлэхдээ “Маралмаа бөө байсан. Бөөгийнхөө зан үйлийг хийж байхдаа миний охиныг ээжээсээ бузартсан гээд сураар ороолгодог байсан. Нүүр, нүд рүү сүү, архи цацдаг байсан. Маралмааг миний охиныг алчихна гэж арай бодоогүй. Хэрэв цэцэрлэг байсан бол охин маань өнөөдөр амьд байх байсан. Маралмаа намайг ажилдаа явсан хойгуур миний охиныг зодож, дарамталдаг байсан юм билээ. Охин маань нэг удаа ааваа та ажилдаа битгий яваач, Маралмаа эгч намайг зодох гээд байна гэж байсан” гэв. Харин талийгаач охины хойд эх болох Г.Маралмаа “Би охиныг үхэлд хүргээгүй. Нас барахаас хоёр хоногийн өмнө Цогт талийгаачийг тэлээгээр ороолгосон нь үхэлд хүргэх шалтгаан болсон. Мөн охин шатан дээрээс хоёр удаа унаж байсан” хэмээн мэдүүлжээ. Г.Маралмаа нь одоо 7-8 сартай хөл хүнд бөгөөд түүнийг иргэд өөрөө хүүхэд тээж байж бусдын үр хүүхдэд харгис авирласан хэмээн бухимдаж байгаа юм.

Эх сурвалж: Шуурхай.мн