Монголчууд бид өмсөх, зүүх, идэж уух гээд бүхий л хүнсний хэрэглээний гол асуудлаа урд хөрш болох Хятадаас зөөж, тэндээс бүрэн хамааралтай болчихоод байгаа гэхэд хилсдэхгүй. 

Өдөр тутмын хоол хүнсэнд хэрэглэгддэг будаа гэхэд л анх заан, анаашны зурагтай нь сайн чанарынх гээд бид өргөнөөр авч хэрэглэдэг байлаа. Өнөөдөр ч авч л байгаа. 

Тэгвэл сошиал ертөнцөөр нэгэн сэрэмжлүүлэг яваад эхэлсэн байна. Тодруулбал, Megu Bolor гэх хаягийн эзэн “Хуурамч будаа Монголд ороод ирчихсэн байна. Сая будаа угаагаад санаандгүй хутгаад авч үзлээ. Тэгсэн чинь будаа нь үйрээд, цав цагаан болчихсон байхаар нь гараараа үрээд үзтэл юу ч үгүй үйрээд уначихлаа. Яг шохой шиг. Тэгэхээр нь YouTube-ээс бичлэг хайгаад үзтэл пластик, төмс хоёроор хийсэн будаа Хятадаас Өмнөд Ази руу их хэмжээгээр гарсан хэрэг манджээ. 

Яана аа, ийм будаанаас хоёр аягыг идсэн хүн нэг том гялгар уут идсэнтэй дүйцнэ гэнэ. Агшилт нь арай биш байсан юм. Сүмтэй будаа 10 кг-ийг авсан.Мэргэжлийн хяналт холбогдох байгууллагууд нь анхааралдаа аваарай. Цааш нь түгээж сэрэмжлүүлээрэй” хэмээгээд зургийг нь оруулжээ.

Өнгөрсөн сарын сүүлээр Хятад улсад төмс, хиймэл резиний хольцоор хийсэн хуурамч будаа худалдаалж байгаа талаар оросын lenta.ru сайтад мэдээлж байсан билээ. Тодруулбал, энэхүү хуурамч будаа нь Хятадын Шаньси мужаас гаралтай бөгөөд тус улсын зах зээлд маш ихээр борлуулагдаж байгаа гэсэн байв. 

Тус улсын мэргэжлийн байгууллагуудын мэдэгдсэнээр хуурамч будааг жинхэнээс ялгахад маш их бэрхшээл тулгарч байгаа аж. Учир нь хуурамч будаа үзэгдэх байдлын хувьд жинхэнээсээ бараг ялгагдахгүй байгааучраас Хятад улсын мэргэжлийн байгууллагаас “Будаа худалдан авахдаа сайтар шалгахыг сануулаад энэхүү будааг хэрэглэсэн тохиолдолд биед маш хортой нөлөө үзүүлнэ” гэдгийг сануулжээ. 

Харин тус улсын зарим хэвлэл мэдээлэлд энэхүү хуурамч будаа Энэтхэг, Индонез, Вьетнам зэрэг улсууд руу худалдаалагдсан гэх мэдээллийг гаргасан байна. Энэхүү мэдээлэлд тус улсын эрх баригчид “Эдгээр улсуудаас гадна Малайз, Сингапурын Засгийн газартай холбогдож, аюулгүй байдлыг хангуулж ажиллаж байна. Одоогоор хуурамч будаа илэрсэн гэх тохиолдол бүртгэгдээгүй бөгөөд тус улсуудын хяналтын байгууллагууд хүнсний зах, дэлгүүрүүдээр шалгалт хийж байгаа” гэх хариу өгчээ.

Харин Хятадын шинжээчид “Резинээр хийсэн хуурамч будаа гаднаас нь харахад ямар нэгэн ялгагдах шинж байхгүй ч хоол хийж байхад хуванцар үнэртэж, шөл нь дээр резин мэт хөвөх болно. Тиймээс эдгээр шинж тэмдэг илэрвэл тэрхүү будааг хэрэглэхгүй байх хэрэгтэй” гэх сэрэмжлүүлгийг хүргэсэн байна.