Сонгинохайрхан дүүргийн 29-р хороо “Драгон” төвийн ар талд баригдаж байсан барилгын хашаа руу буудай ачиж явсан чиргүүлтэй, хүнд даацын автомашин унаж осолдсон талаар бид мэдээлсэн.
Харин өчигдөр ослын газарт очиход барилгын урд, хойд замыг хаасан тул түгжрэл нэлээд үүссэн байдалтай, замын цагдаа болон онцгой байдлын албан хаагч нар ослын газрыг хамгаалалттаа авсан байв.
Харин замын хажуу руу унаж, осолдсон машиныг гаргаж аваагүй байлаа.
Осол "Драгон" төвийн арын 22 а,б болон 23а байрны голын туслах замд болжээ. Тодруулбал туслах замтай хаяа дэрлэн 135 айлын 16 давхар орон сууцны барилга барихаар хэдийнэ суурийг ухаж эхэлсэн бөгөөд замтай барилгын суурийг тулгаж ухсанаас зам цөмөрч хүнд даацын автомашин осолдсон байна.
Азаар хүний амь нас эрсдээгүй ч осолдсон автомашины жолооч багагүй гэмтэл авсан тул эмнэлгийн тусламж үзүүлэхээр ГССҮТ рүү шилжүүлсэн байна. Харин ослын шалтгаан болон жолоочийг согтууруулах ундааны зүйл хэрэглэсэн эсэхийг ЗЦГ-ын Урьдчилан сэргийлэх хэлтсийн мэргэжилтэн, ахлах дэслэгч Х.Одбаяраас тодруулахад “Одоогоор энэ талаар мэдээлэл өгөх боломжгүй. Ямартай ч шинжилгээ авсан байгаа. Ослын шалтгаан удахгүй тодорхой болно” гэв.
Харин энэ талаар иргэд “Хүүхдийн тоглоомын талбайг булааж эрх мэдэлтэнүүдийг лоббидож газрын зөвшөөрөл авахаар ийм зүйл болж байгаа юм. Үнэхээр хуулийн дагуу барилга барих зөвшөөрөл авч, журам ёсоор нь сууриа ухсан бол өнөөдөр ийм зүйл болохгүй байсан. Ямар ч хүн харсанзамтай тулгаад барилгын суурийг ухахаар зам цөмөрч л даараа шүү дээ. Харин энэ удаагийн хэрэг сануулга боллоо. Ер нь энэ мэтээр барилгын суурийг хэтэрүүлэн ухаад байвал олон хүний амь нас эрсдэхгүй гэх баталгаа алга” хэмээн бухимдацгааж байлаа.
Үнэхээр ч "Хадан ус" ХХК-ийн захиалсан 135 айлын 16 давхар орон сууцны барилгыг "Мон хауз" ХХК барихын тулд автомашины замтай суурийг тулгаж ухсан нь нүднээ илт.
Өргөн уудам газар нутагтай манай улсын нийслэлд өдгөө газрын төлөөх тэмцэл, сөөм газрыг ч ашиглах гэсэн хүмүүсийн шунахай байдал хэрээс хэтэрч иргэдийн амь нас, эрүүл мэндэд заналхийлсээр байгаа нь үнэхээр харамсалтай.
Энэ асуудлыг холбогдох албаны хүмүүс анхааралдаа авахгүй бол “Ниргэсэн хойно нь хашгирах”-ын үлгэр болж ард түмэн амь нас эрүүл мэндээрээ хохирвол хариуцлагыг нь хэн хүлээх вэ.
Магадгүй гашуун үнэний түүх болох хориглосон гэх замаар явж байсан хүнд даацын автомашины жолооч мэтийн жирийн иргэд л буруутан болох уу гэдгийг ч албаны хүмүүсээс асууя.
Баянгол дүүргийн 14 дүгээр хорооны алдарт 16 дугаар байрны дуулиан намжиж амжаагүй байхад дахин барилгын суурийг шунан ухснаас болж асуудал дэгдэв.
Тус газарт "Хадан ус" ХХК-ийн захиалгаар "Мон хауз" ХХК 135 айлын 16 давхар орон сууцны барилга барихаар суурийг ухаж, барилгын ажлаа эхлүүлээд байжээ.
Барилгын ажил тавдугаар сард эхэлсэн бөгөөд оршин суугчид хүүхдийн тоглоомын талбайд барилга барих гэж байгаад нэлээд эсэргүүцэж, тэмцсэн боловч ямар нэгэн үр дүнд хүрээгүй байна.
Гэвч “мөнгө цагаан нүд улаан” гэгчээр олны дургүйцлийг төрүүлэн байж сүндэрлүүлэхээр улайран зүтгэсэн компаниуд барилгын суурийг замтай тулгаж барьсанаас ийнхүү осол гарчээ. Хэдийгээр тухайн замаар хүнд даацын автомашин явахыг хориглосон ч замтай хаяа дэрлүүлэн барилгын суурийг ухсан компаниудын хариуцлагагүй үйлдэл гэдгийг ослын газар байсан хүмүүс хэлж байв.
Баянгол дүүргийн 16 дугаар байрны сууринд “Би Жи Би ЖИ” ХХК барилга барихаар суурийг хэтрүүлэн ухсанаас байр нурах аюулд хүрч оршин суугчдыг нэлээдгүй сандаргаж, нүүлгэн шилжүүлсэн.
Гэвч эцэст нь төр бүх ачааг нураандаа үүрч иргэдийг зочид буудалд байрлуулсан, нүүлгэн шилжүүлсэн бүх зардлыг Нийслэлийн Засаг даргын нөөц хөрөнгөнөөс төлсөн.
Уг нь бүх хохирлыг барилгын суурийг шунан ухсан “Би Жи Би Жи” ХХК хариуцна хэмээж байсан нь өдгөө төрд өрөө төлсөн эсэх нь ч тодорхойгүй байгаа.
Тухайн үедээ л олны анхааралд байсан энэ асуудлын тоос намжиж амжаагүй байтал дахин ийм зүйл болж байгаа нь манай улсад барилгын салбар хэрхэн хөгжиж байгаа, хууль дүрэм хэрхэн үйлчилж байгаагийн тод жишээ болов.
24tsag.mn Б.Батчимэг
