Нэг хэсэг 70 саяын үнэтэй усан хөшиг иргэдийн нүдийг бүлтийлгэж чихийг сортоолгож байсан гэхэд хилсдэхгүй. Нийслэлийнхээ хөрсний бохирдол, агаарын тоосжилтыг багасгаж байна хэмээн ихэд бахархалтайгаар 70 саяын усан хөшиг нээлтээ хийж улаан туузаа хайчилсанаар Нийслэлдийн Засаг даргын ажлын хэсэг нүүрээ хийх газаргүй болсон. “Гоожуур” хийчихээд түүнийгээ 70 саяар үнэлж дундаас нь мөнгө идлээ гэж амтай бүхэн шуугиж байсан цаг саяхан. Тэгвэл бүтээн байгуулалтыг ингэж хийдэг гэдгийг өмнийн цэнхэр Өмнөговь аймгаас уншигч танд хүргэж байна.
Үлэг гүрвэлийн цэцэрлэгийг Монголд бүтээж байна
Үлэг гүрвэлийн өлгий нутаг Өмнөговь аймагт Монголын хамгийн анхны гэх тодотголтой цэцэрлэгт хүрээлэн ирэх арваннэгдүгээр сард ашиглалтанд орох гэж байна. Нийт 10 га талбайнд 8,1 тэрбум төгрөгийн өртэйгээр бүтээн босгож байгаа энэхүү цэцэрлэгт хүрээлэнд 20 гаруй төрлийн үлэг гүрвэлийн хөшөө бүтээсэн байна. Эдгээр хөшөөний онцлог нь хөдөлж, дуугардаг гэдгээрээ Монголд анх удаа гэх тодотголыг зүүгээд байгаа юм. Түүнчлэн анхны гэх тодотголыг 30 диаметр бүхий гэрэлтэж, хөгжмийн хэмнэлээр “бүжиглэдэг” усан оргилуур үргэжлүүлэнэ. Цэцэрлэгт хүрээлэнгийн ажлыг “Говь-Эрдэнэс” ХХК гүйцэтгэж байгаа. Хэдий өнгөрсөн зургадугаар сарын нэгэнд ашиглалтанд орох төлөвлөгөөтэй байсан ч бороо их хэмжээгээр орж, сарын турш цахилгаан тасарснаар ашиглалтанд орох хугацаа ийнхүү таван сараар хойшилсон байна.
Тус байгууламжийн 40 хувь нь бүхэлдээ ногоон байгууламж байх аж. Цаашид аймгийн төвөө бүхлээр нь ногоон байгууламжтай болгох зорилт тавин ажиллаж буй юм байна.
“Говь-Эрдэнэ” ХХК-ны захирал А.Идэрцог “Монголд анхны гэх олон тодотголыг манай цэцэрлэгт хүрээлэнд бий. 25 метрийн өндөртэй цамхаг байна. Хиймэл нуур, усан оргилуур гээд бид шинэ техник технологийг энэхүү цэцэрлэгт хүрээлэнгээрээ дамжуулан нэвтрүүлж байна. Мөн цэцэрлэгт хүрээлэн ажиллаж эхэлснээр байнгын 20 хүний ажлын орон тоо шинээр бий болох юм. Хамгийн чухал зүйл бол гадаад, дотоодын аялагчдыг татах. Үүгээрээ дамжууулан манай аймгийг зорих жуулчдын тоог нэмэгдүүлэх нь бидний эрхэм зорилго байгаа” гэв.
Д.Ундрах /24tsag.mn/
