Шинэчлэлийн Засгийн газар нь ард түмний амьжиргааг дээшлүүлэх, эдийн засаг, хөгжил дэвшил, бүтээн байгуулалтын олон ажлууд хийж хэрэгжүүлсэн. Тухайлбал, аймаг бүрийг холбосон зам, аймаг бүрт 1000 айлын орон сууц, орон сууцны 8 хувийн зээл, гудамж төсөл, нүүрс хөтөлбөр, үнэ тогтворжуулах хөтөлбөр зэргийг амжилттай хэрэгжүүлэн ажиллаж байсан. Энэ бүхний үр дүнд шатахууны үнэ сүүлийн жилүүдэд тогтвортой бага төвшинд, олон мянган залуу гэр бүл орон сууцтай болж, хөдөөгийн аймгууд засмал замаар нийслэлтэй холбогдож, их хотын замын түгжрээ буурч, орлогыг асар ихээр нэмэгдүүлж чадаагүй ч айл, өрхөөс гарах зардлыг бууруулах олон арга хэмжээ, үйл ажиллагааг шат дараатай зохион байгуулж ажилласан. Үүний нэг тод жишээ нь Шинэчлэлийн Засгийн газрын хэрэгжүүлсэн "Нүүрс хөтөлбөр" буюу гэр хорооллын 172.000 айл өрхийг хямд, чанартай нүүрсээр хангах зорилготой ажил юм.
Шинэчлэлийн засгийн газар хэлэх үгтэй, хийсэн ажилтай байсныг нүдээрээ харж, амьдрал дээр мэдэрч эхэлсэн эхний хоёр жилд улс төрийн тодорхой зорилгоор ялагдсан хүчний ташуурдалт биш, чөдөрлөлт, хонзогнол болон нам дамжсан тодорхой бүлэглэлийн захиалгаар засгийн газрыг унагаах, олон түмэнд муухай харагдуулах, харлуулах тодорхой зорилго, зохион байгуулалттай үйл ажиллагаа шат дараатайгаар явсныг монголын олон мянган сонгогчид мэдэж байгаа.
Шинэчлэлийн Засгийн газар, Ардчилсан намын мөрийн хөтөлбөрт тусгагдаж амжилттай хэрэгжүүлсэн ажлыг дэс дараалан харлуулах, хэн нэгнийг зохиомол хэрэгт гүтгэх, доромжлох, аж амьдрал, нэр хүндийг үгүй хийх гэх зэрэг хүний санаанд оромгүй аргаар улс төрийн ашиг хонжоо хайж байна.
Монголын ард түмний нүдэн дээр 5 өдөр хэн нэгнийг заавал яллах, заавал буруутгах захиа даалгавар бүхий зохиомол жүжгийг дэглэж дууслаа. Энэ бүхнийг нүдээрээ үзэж, чихээрээ сонссон Ардчилсан намын гишүүд, дэмжигчид бид УЛС ТӨРИЙН ХЭЛМЭГДҮҮЛЭЛТ ЗОХИОМОЛ ЖҮЖГИЙН ТАЛААР дараах мэдэгдэлийг хийж байна.
Нэг. Энэ бол орчин цагийн улс төрийн хэлмэгдүүлэлт. Улс орны хөгжил, ард иргэдийн сайн сайхан байдлын төлөө ажилласан хүнийг өөрийн хувийн өчүүхэн эрх ашгаас дээгүүр үзэж захиалгат улс төрийн хэлмэгдүүлэлт хийлээ. АТГ, Прокурорын танилцуулж бүтэн жил хууль зөрчин байж барьж хорьсон, хэвлэл мэдээлэл олон нийтэд ялтан гэж танилцуулсан хэрэгт буруугүй тогтоож Даваахүү, Мөнгөнтуяа нарыг цагаатгалаа. Яагаад төрийг төлөөлж ажилласан Л.Гансүхийг цагаатгах тогтоол уншаагүйг гайхаад барашгүй. Хэрэг байвал хэрэгтэн олдно гэсэн үг өнөөгийн бидний нийгэмд үйлчлэх ёсгүйг хатуу анхааруулъя.
МОНГОЛЧУУД 1937 ОНЫ ХАР ДАРСАН ЗҮҮД ШИГ ОН ЖИЛҮҮДИЙГ МАРТААГҮЙ ГЭДГИЙГ САНУУЛЖ БАЙНА.
Хоёр. Энэ бол Монголын ардчилалд учирч байгаа аюулын харанга. Хүний эрх, эрх чөлөө бол Ардчиллын амин сүнс мөн. Цагаан морин жилээс түүчээлсэн Азийн цээжин дэх өнчин ганц Ардчилалд минь аюулын харанга дэлдлээ.
Нэгэн цагт Монголын ардчилагчдын туг болж намирч байсан Л.Гансүхийг зохиомол хэргээр яллаж 4.6 жилийн хорих ял, 2.5 тэрбум төгрөгийн торгууль бүхий захиалгат Шүүхийн тогтоол уншлаа. Монгол оронд хүний эрхийг хэрхэн зөрчиж болдог, хүсвэл хэн нэгнийг ялтан болгож чадах нийгэмд амьдарч байгааг нээлттэй нийгмийн ачаар бид мэдэрлээ.
Эгэл борчуул, нүүрс хэрэглэгчдийнхээ төлөө Засгийн газрын хөтөлбөрийг цаг хугацаатай уралдан гүйцэтгэж, олон түмнийхээ хүсэлт, хүлээлтийг хангасан үйл ажиллагааг гардан зохион байгуулсан Ерөнхий сайдын ахлах зөвлөхөөр ажиллаж байсан хүнийг яллаж, Ардчилсан Монгол улс өнөөдөр улс төрийн хоригдолтой боллоо.
ШУДАРГА ҮНЭН, АРДЧИЛАЛ, ЭРХ ЧӨЛӨӨНИЙ АМЬД ТҮҮХ, БАТАЛГАА БОЛСОН МЯНГА МЯНГАН АРДЧИЛСАН НАМЫН ҮЗЭЛ БОДОЛ, ҮЙЛ ХЭРЭГ НЭГТ ЖУРМЫН НӨХӨДДӨӨ ХАНДАН БИД УЛС ТӨРИЙН ХОРИГДОЛТОЙ ОРОН БОЛОХ ЁСГҮЙГ ОЛОН НИЙТЭД ХАНДАН МЭДЭГДЭЖ БАЙНА.
Гурав. Энэ бол хууль, шүүхийн байгууллагын ялзрал. Хараат бус ажиллах үндсэн үүрэг бүхий АТГ, Прокурорын байгууллага, Шүүхийн байгууллага хэн нэгний утсан хүүхэлдэйн дүрээр ажиллаж байна. Ардчилсан орны шүүх засаглал өнөөдөр улс төрийн тодорхой захиалгаар үндсэн хуулийн төрийн байгууллагуудаар аудит, мониторинг-шинжилгээ,хэрэг бүрдүүлэлт, яллах дүгнэлт гаргуулж, хараат шүүхээр шүүлгэж эгэл жирийн олон мянган иргэнийг хилс хэргээр яллаж байна.
Хэвлэл мэдээллийн ил тодын ачаар Монголын ард түмэн шүүх засаглалын дүр төрх түүнд үйлчилсэн аудитын байгууллага, прокурор, шүүгчдийн үнэн нүүр царайг танилаа. Харийн болон дотоодын дарамт, шуналд хазаарлуулсан нам дамжсан бүлэглэл, зарим рецедив гэмт хэрэгтнүүдийн хүсэл сонирхлоор ерөнхий сайдын ахлах зөвлөх Л.Гансүхийг болон жирийн компанийн захирал, ажилтныг улс төрийн зорилгоор хилсдүүлэн яллаж, торгож байгааг АН-ын жирийн олон мянган гишүүд бид жигшин эсэргүүцэж байна.
Бид шинэ цагийн До яам болж, улс төрийн зорилгоор ашиглагдаж байгаа АТГ-ын үйл ажиллагаанд шүүмжлэлтэй хандаж, засаглалын тогтвортой байдлыг алдагдуулах хэрэгсэл болж байгааг нэн даруй анхааралдаа авч залруулахыг УИХ-аас шаардаж байна.
ХУУЛЬ ХҮЧНИЙ БАЙГУУЛЛАГЫН ШИНЭЧЛЭЛИЙГ ОЛОН НИЙТЭД НЭЭЛТТЭЙ ХИЙХИЙГ ШААРДАЖ БАЙНА.
АРДЧИЛСАН НАМЫН ГИШҮҮД, ДЭМЖИГЧИД
2015.09.22
