НИТХ-ын төлөөлөгчид “Нийслэл хотын татварын хувь хэмжээг тогтоох” асуудлыг өчигдөр хэлэлцэн баталсан билээ.
Тиймээс нийслэл хотын татварын талаарх 24 баримтыг хүргэж байна.
1. Нийслэл хотын татвар нь ирэх сарын 1-нээс буюу маргаашнаас хэрэгжиж эхэлнэ.
2. Нийслэлийн татварыг нэг хувь байхаар тогтсон.
3. Архи согтууруулах ундаанаас нэг хувийн татвар авна. Тодруулбал, иргэн та худалдан авсан нэг шил архи тутамдаа нэг хувийн татварыг нийслэлийн төсөвт төвлөрүүлнэ гэсэн үг юм.
4. Тамхи худалдан авсан бол мөн татвар төлнө.
5. Зоогийн газар, баар, ресторанаар үйлчлүүлсэн тохиолдолд ч мөн татвар төлөх юм.
6. Амралтын газраар үйлчлүүлсэн иргэд худалдан авсан бараа бүтээгдэхүүн, үйлчилгээний нийт үнийн дүнгийн нэг хувийг татвар болгон төлөх болов.
7. Зах, хүнсний дэлгүүр, супермаркет гээд бүхий л газраас дээрх бүтээгдэхүүнийг худалдан авсан тохиолдолд татвар төлнө гэсэн үг юм.
8. Хотын татварыг хурааснаар жилд 13 орчим тэрбум төгрөг нийслэлийн төсөвт төвлөрөх аж.
9. Энэ нь нэг иргэн жилд дунджаар 100 мянган төгрөгийн татвар төлнө гэсэн юм байна.
10. Амралтын газраар ихэнхдээ гадаадын иргэд үйлчлүүлдэг тул энэ нь манай улсын эдийн засагт бага ч гэсэн нэмэр болно гэж НИТХ-ын төлөөлөгчид үзэж байгаа аж.
11. Татварыг тухай худалдаа, үйлчилгээ үзүүлж байгаа аж ахуй нэгж байгууллага тусгайлсан журмын дагуу төрд дамжуулах үүрэг хүлээнэ.
12. Нийслэлийн Засаг дарга Э.Бат-Үүл, НИТХ-ын дарга Д.Баттулга тэргүүтэй хотын удирдлагууд татварыг зөвхөн амьдралын боломжтой, тансаг хэрэглээтэй иргэд төлнө гэдгийг онцолсон.
13. Нийслэл хотын нутаг дэвсгэрт үзүүлсэн үйлчилгээ, барааг худалдан авсан этгээдэд нийслэл хотын албан татвар ногдуулахад энэ хууль үйлчилнэ.
14. Нийслэл хотын албан татвар тооцох үнэлгээг борлуулсан бараа, үзүүлсэн үйлчилгээний үнийн дүнд үндэслэн тооцно.
15. Нийслэл хотын албан татвар тооцох үнэлгээг харьяалах татварын алба тухайн үеийн зах зээлийн бодит үнэд үндэслэн тодорхойлно
16. Нийслэл хотын албан татвар тооцох үнэлгээг гадаад валютаар хийсэн бол гүйлгээ хийгдсэн өдрийн Монголбанкны ханшийг үндэслэн төгрөгт шилжүүлнэ.
17. Албан татвар суутгагч нь нийслэл хотын албан татварыг бараа борлуулсан, үйлчилгээ үзүүлсэн тухай бүрд суутган авч, төлбөрийн баримт дээр нийслэл хотын албан татварын хувь, хэмжээг тусгана.
18. Албан татвар суутгагч тухайн сард борлуулсан бараа, үзүүлсэн үйлчилгээнд ногдох албан татварыг дараа сарын 10-ны өдрийн дотор төсөвт төлж, тайланг батлагдсан маягтын дагуу дараа улирлын эхний сарын 20-ны өдрийн дотор харьяалах татварын албанд тушаана.
19. “Эдийн засаг хүнд байгаа энэ үед гэрээс гадуур хооллосон жирийн ажилтан, оюутан сурагч гээд бүгд хотын татвар өгөх нь шударга бус” гэж НИТХ-ын цөөнгүй төлөөлөгчид үзэж эсэргүүцлээ илэрхийлж байлаа.
20. Нийслэл хотын албан татварын хуулинд татвар авах ресторан, баарыг тусгайлан тодорхойлсон байна.
21. “Ресторан” гэж үйлдвэрлэлийн нарийн ажиллагаа шаарддаг олон нэр төрлийн хоол ундаа, түүний дотор нэршсэн болон захиалгат хоолыг технологийн өндөр түвшинд үйлдвэрлэж, хэрэглэгчийн тав тухтай хооллох нөхцөлийг хангасан дээд зэргийн үйлчилгээг зохион байгуулдаг хоолны газрыг хэлэх аж.
22. “Баар” гэж хөгжим, гэрэлтүүлэг болон тусгай зориулалтын бусад төхөөрөмжөөр тоноглогдсон, үйлчлүүлэгчийн амралт, чөлөөт цагийг тав тухтай өнгөрүүлэхэд зориулагдсан, төрөл бүрийн ундаа, хөнгөн зууш, амттанаар үйлчилдэг үйлчилгээний газрыг гэж нарийвчлан зааж өгчээ.
23. “Зочид буудал” гэж үйлчлүүлэгчийг хүлээн авч байр, хоолны болон бусад үйлчилгээ үзүүлдэг, нэмэлт тоноглол, тусгай төрөлжсөн албад бүхий цогцолборыг хэлнэ.
24. “Амралтын газар” гэж тав тухтай амрах, зугаалах нөхцөлийг бүрдүүлсэн байр, хоолны үйлчилгээ үзүүлэх байгууламжид амарч, үйлчлүүлсэн бол татвар төлөх юм.
Эх сурвалж: 24tsag.mn
