“Шинэ үе” продакшны жүжигчин Л.Сөрөлт, дуучин Түмэн-Өлзийтэй хамтран“Хайрын тэнгэр диваажин” хэмээх анхны тоглолтоо ирэх сарын 9-нд Монгол бөхийн өргөөнд хийхээр болжээ. Тоглолтын бэлтгэлийн үеэр жүжигчин Л.Сөрөлттэй ярилцлаа.
 
-Анхны тоглолтоо хийх гэж байна. Бэлтгэл ажил ямар шатандаа байна вэ?
 
-Тоглолт онцлох зүйл олонтой сайхан болно гэж бодож байна. Тоглолтын бэлтгэл ажил маш их байгаа. Яагаад гэхээр одоо цагт хэвлэл мэдээллийн салбар хэт олон болсонтой холбоотой, өмнө нь таван телевиз, радио байхад ажил амжуулахад илүү хялбар байж. Гэтэл өнөөдөр 20, 30 телевиз байна. Бүгдээр нь орж тоглолтын талаар уулзаж, ярилцах гэхээр цаг, зав их шаардах юм. “Хайрын тэнгэр диваажин” тоглолт дуучин, хошин урлагийн жүжигчин хамтарч буйгаараа онцлогтой. Тиймээс үзэх зүйл их байна. Тоглолтод“Хөсөгтөн” хамтлаг оролцоно. Мөн “Шинэ үе” продакшн, дуучин Э.Төрмандах, О.Гансувд, П.Баярцэнгэл, “Улаансарнай”, “Маршал” хамтлаг урилгаар оролцох юм.
 
-Уншигчид Л.Сөрөлт гэж хүн юу хийсэн болоод тоглолт хийж байгаа юм бол гэж сонирхож байгаа байх. Та дуулж эхэлснээсээ хойш хэчнээн дуутай болсон бэ?
 
-Овоо хэдэн дуу бий. Хөвсгөл аймгийн Хатгал сумын 90 жилийн ойд зориулсан дууг дуулсан. Тэндээ сүрхий хит болсон. Бүх арга хэмжээний эхлэл, төгсгөлд явдаг. Надад аавын тухай хоёр дуу бий. Нэг дууных нь үгийг Н.Ариунболд ах бичиж, Н.Баасандорж ах аяыг хийсэн. “Аавдаа”, “Аав минь дэндүү яараа юу” нэртэй. Олонд хүрээгүй“Хөвсгөл” гэж гайхалтай найраглал бий. Энэ найраглалыг олонд хүргэхийн тулд дахин уншиж, Т.Сэр-Од багшаар хөгжмийн найруулгыг хийлгэсэн. Хоёр, гурван хоногийн өмнө хөгжмийн зохиолч Эрдэнэ ахтай хамтран“Гоо марал” хэмээх дуу бүтээсэн. Ганцаараа дуулсан дуу олон байна. Гэхдээ би тэр бүхнийг олонд таниулахын тулд сайн ажиллаагүй. Би хошин урлагийн хүн. Сүүлийн үед надад нэг зүйл ажиглагдлаа. Манай үзэгчид хэр олон дуутай байна тэр хүн тоглолт хийдэг гэж боддог юм байна. Миний бодлоор бол бие биеийнхээ арга барилыг мэддэг дуучид яагаад тоглолт хийж шинэ дуугаар үзэгчидтэйгээ танилцаж болохгүй гэж.
 
-Та хоёр тоглолтдоо зориулж шинэ уран бүтээл гаргасан уу. Тоглолтын үеэр дуулах ямар шинэ уран бүтээл байна вэ?
 
-Хоёр шинэ уран бүтээл хийсэн. Нэг нь Т.Сэр-Одын хөгжим, Ганхүрэлийн шүлэг “Хайрлах өдөр”, Эрдэнээгийн хөгжим “Нандин” хэмээх бүтээл байна.
 

 
-Жүжигчин хүн яагаад дуу дуулах болсон бэ. Тэр дундаа яагаад дуучин А.Түмэн-Өлзийтэй хамтран дуулах болсон бэ?
 
-Бид СУИС-ийн нэг төгсөлтийн оюутнууд. Хоолойн өнгө, хэв маягийн хувьд бид нийлэх юм байна гэж удаан бодсоны эцэст А.Түмэн-Өлзийд хамтарч дуулах саналыг тавьсан. Тэгээд л “Хөөрхөн” дуу бүтсэн дээ. Энэ цагаас хойш найзтайгаа уран бүтээлийн ганзага нийлүүлэн явж байна.
 
-Дууны ямар нэгэн онолын хичээл заалгаж байв уу?
 
-Тэгэлгүй яахав. СУИС-д жүжигчний ангид дуулах ур зүйн хичээл ордог. Намайг жүжигчний ангид сурч байхад дуулах ур зүйн хичээлийг гавьяат жүжигчин Б.Цэцэгээ багш заасан. Надад “Дуундаа сонирхолтой, идэвхтэй, авьяас байгаа юм чинь жүжигчний ангиасаа гараад дуулаачийн ангид ороод ир. Тэгвэл багш нь төгсгөөд ажлын байртай болгож өгнө” гэж байв. Би ч аав, ээждээ хэлээд нэлээд удаан бодож ярилцсан. Аав, ээж хоёр минь надад “Чи жүжигчин болох гэж л энэ сургуульд орсон биз дээ. Нэгэнт шийдсэн сонголтоосоо буцах хэрэг байна уу” гэсэн. Тэгээд би нэгэнт сонгосон жүжигчин мэргэжлээрээ суралцахаар шийдсэн. Хамгийн гол нь багш минь надад тэгж урам өгсөнд баярладаг. Тэр үед багшдаа хэзээ нэгэн цагт дуулах болно гэж хэлж байсан юм.
 
-Та “Шинэ үе” продакшнтай хамгийн удаан хамтран ажиллаж байгаа. Хэрхэн хамтлагийн гишүүн болж байсан бэ?
 
-2006 онд СУИС-ийг төгсөөд дадлага хийж байгаад “Шинэ үе”-д орж байлаа. Анх Н.Ариунболд ахад продакшнд нь жүжигчнээр орох хүсэлтэй байгаагаа хэлж байв. Тэгэхэд “Ажиллаж болно. Гол нь чи өөрийгөө таниулж, энэ мэргэжлээрээ тууштай ажиллаж чадна гэвэл болно” гэж хэлж байлаа. Энэ цагаас хойш есөн жил өнгөрсөн байна. Продакшнаас олон хүн орж, гарч байдаг. Харин миний хувьд “Шинэ үе”-ийн нөмөр нөөлөг дор өдий зэрэгтэй явж байна. Тийм болохоор “Шинэ үе”-дээ хоёргүй сэтгэлээр ажиллана гэж боддог. Зарим хүн дуу дуулж, жүжигчин байхаа больж продакшнаасаа гарах гэж байна уу гэж асуух байх. Үгүй. Яагаад гэвэл миний мэргэжил жүжигчин. Би мэргэжилдээ хайртай. Цаашид ч жүжигчнээрээ ажиллах болно.
 
-“Такси” кинонд анх удаа гол дүр бүтээлээ. Энэ кинонд дүр бүтээх саналыг хэрхэн хүлээж авсан бэ?
 
-Гол дүр бүтээх саналыг талийгаач Аси ах надад тавьсан. Таксины жолооч болох гэж байгаа залуугийн дүрд тоглосон. Эгэл нэгэн таксины жолоочийн амьдралын өдөр, цаг бүр өөр өнгөтэй, ямар өрнүүн байдгийг төсөөлөөгүй явжээ. Хүн болгон өөр араншин, ертөнцийг үзэх үзэлтэй учраас тэр бүхэнд тохируулж үйлчлэх амаргүй. Таксины жолооч орчуулагч, зөөгч, туслагч, хамгаалагч ч болж мэднэ. Бас Улаанбаатар хотын өнцөг булан бүрийг мэддэг хүмүүс. Архинд нэлээд дуртай нөхөр амьдралаа өөрчилж, өөрийгөө ялж, архинаас татгалзаж байгаа тухай кинонд өгүүлдэг.
 
-Дэлгэцнээс өөрийгөө харах ямар байдаг вэ?
 
-Гоё. Заримдаа ичмээр. Тоглолтын бичлэг, эсвэл оролцсон нэвтрүүлгээ ухрааж үзэж байхдаа сонин зүйл ярьчихсан ч юм уу гэж бодох үе бий. Үгээ цэгнэхгүй бол гоочлуулна. Тийм болохоор бодолтой байх хэрэгтэй. -Хамтлаг өнөр өтгөн сайхан болж байна. Харин хувийн амьдралын хувьд Л.Сөрөлт гэх айл хэр өнөр олон болж байна вэ? -Өнөр олуулаа болжээ. Хүүхдүүдийнхээ өмнө хариуцлага хүлээсэн аав, эхнэрийнхээ өмнө сайхан амьдрах үүрэгтэй нөхөр хүний хувьд илүү сайхан амьдралын төлөө хичээж ажиллаж байна.
 
-Таны хүүхдүүд аав, ээжийнхээ алийг нь дуурайсан бол?
 
-Намайг. Өвчсөн юм шиг намайг эсвэл өвөөгөө дуурайдаг.
 
-Урлагийнханд энэ жил хатуу байна. Олон сайхан уран бүтээлчээ алдлаа. Ийм хүнд үед шинэ уран бүтээл хийх хэцүү байсан байх?
 
-Хатуу жил байлаа. Энэ бүх зүйл ингээд л зогсоосой гэж дотроо залбирч байна. Үүнээс халилгүйгээр энэ хүрээд зогсоосой гэж бид залбирч байгаа. “Шинэ үе” хамтлагийн уран бүтээлчдэд цаг зуураар янз бүрийн зүйл тохиолдлоо. Энэ болгонд өөрсдийгөө цэгнэж, дүгнэж, бүх зүйлд хамт олноороо шийдвэр гаргаж байсан. Мэдээж Н.Ариунболд ах гол шийдвэрийг гаргана. Гэхдээ ах асуудалд“Би захирал юм чинь” гэж ханддаггүй. Бид хоорондоо ярилцана. “Сельфинээс боллоо” шинэ тоглолтын санааг хамтлагаараа ярилцаж байгаад л гаргасан. Тоглолт зохион байгуулж байж л үр хүүхдээ хоолтой, ундтай байлгана шүү дээ. Тэгэхгүй бол хэн бидний хүүхдийг хооллож, машинд минь бензин хийх билээ. Тийм болохоор бид ажиллах ёстой. Энэ бол хаана ч байдаг зарчим.
 
Г.Нямсүрэн