МАН-ын Нийгмийн хөгжлийн бодлогын газраас “Асуудал-Шийдэл” нээлттэй хэлэлцүүлгийг оюутнуудын дунд зохион байгууллаа. Хэлэлцүүлэгт УИХ-ын гишүүн Д.Сумъяабазар, МАН-ын Нийгмийн хөгжлийн бодлогын газрын дарга С.Чинзориг, НАМОХ-ны ерөнхийлөгч Б.Амарсанаа нар оролцсон юм. Энэ үеэр оюутнуудын сургалтын төлбөр, дотуур байр, эрүүл мэнд, тэтгэлэгийн асуудлыг хөндөн ярилцсан юм. Мөн оюутнуудын өмнө тулгамдсан асуудлын талаар санал бодлоо хуваалцлаа. Энэ үеэр МАН-ын Нийгмийн хөгжлийн бодлогын газрын дарга С.Чинзориг зарим баримт судалгааг танилцуулсан. Монгол Улсын хэмжээнд нийт 90 гаруй их дээд сургууль үйл ажиллагаагаа явуулдаг байна. Үүнд 170 гаруй мянган хүүхэд суралцдаг юм байна. Түүнчлэн нарийвчилсан судалгаанаас харахад нийт оюутнуудын 57 хувь нь хөдөө орон нутгийн хүүхдүүд байдаг. Харин 43 хувь нь хот суурин газрын хүүхдүүд байдаг аж. Тиймээс хөдөөнөөс ирж буй хүүхдүүдэд дотуур байрны асуудал хамгийн тулгамдсан асуудал болдог гэдгийг С.Чинзориг дарга онцолсон юм. Ерөнхийдөө дотуур байранд хамрагдах нийт оюутнуудын 13 мянга нь дотуур байранд хамрагдсан гэх тооцоо байгаа аж. Үүнээс гадна Их дээд сургуулиудын сургалтын төлбөрийн талаар олон талын байр суурь илэрхийлэгдэж байв. Тухайлбал, сургуулиудын сургалтын төлбөр чухам юунд зарцуулагдаж байгаа талаар мэдээлэл авах хүсэлтэй оюутнууд их байдаг байна. Тиймээс тухайн сургуулийн Удирдах зөвлөлд оюутны төлөөллийг түлхүү оруулах нь зүйтэй гэдэг байр суурь илэрхийлэх оюутан олон байсан юм. Ер нь их дээд сургуулийн үйл ажиллагаа зөвхөн оюутнуудын сургалтын төлбөрөөр явдаг. Уг нь хууль дүрмийн дагуу тэд олон хэлбэрээр санхүүжилтээ олж авах ёстой гэхчилэн санал бодлоо илэрхийлж байв. Учир нь их, дээд сургуулиуд зөвхөн оюутны төлбөрөөр санхүүжилтээ хийдэг нь сургалтын төлбөр нэмэгдэх гол шалтгаан гэдгийг мөн хэлж байсан юм. Түүнчлэн оюутнуудын зүгээс номын сан барьж, байгуулах асуудлыг илүүтэй хөндөж байлаа. Мөн томоохон их дээд сургуулиудын дотуур байрууд бүгд 4 давхар. Тэднийг нурааж, газар дээр нь олон давхар оюутны дотуур байр барих санал ч мөн гарч байв. Ингэснээр хөдөө орон нутгийн оюутнуудын дотуур байрны асуудал шийдэгдэнэ гэдгийг тэд олж харжээ.
Энэ мэтчилэн оюутнууд өөрсдийн тулгамдсан асуудлаа хэлэлцсэн юм. Хамгийн гол нь МАН-ын Нийгмийн хөгжлийн бодлогын газраас оюутнуудын дээрх тулгамдсан асуудалд тулгуурлан хууль боловсруулан өргөн барихаар бэлдэж байгаа аж. Энэ хүрээнд олон судалгааны ажил явуулж эхэлжээ. Түүнчлэн ирэх аравдугаар сард дахин томоохон хэлэлцүүлгийг зохион байгуулахаар бэлдэж байгаа юм байна.
Д.Билэг
