Монголын рок, попын ертөнцөд өөрсдийн гэсэн орон зайгаа хэдийнэ бий болгож, олны хайр хүндэтгэлийг хүлээсэн "Guys" хамтлагийн залуус шинэ уран бүтээлдээ ханцуй шамлан оржээ. Хэсэг хугацаанд уран бүтээлээсээ хөндийрч, "завсарлага" аваад байсан тус хамтлаг ийнхүү урлагтаа эргэж ирсэн ч экс гишүүн Х.Бат-Ундрал хар тамхины хэрэгт холбогдож, шуугиан тарилаа. Харин хамтлагтаа үнэнч хэвээр үлдсэн гурван гишүүн өчигдөр мэдээлэл хийж, шинэхэн мэндэлсэн уран бүтээлээ үзэгч, фэнүүддээ танилцуулсан юм. Энэ үеэр "Guys" хамтлагийн гишүүн М.Мягмартай уулзаж, дараах тайлбарыг авав.

-Хамтлаг тань гурван гишүүнтэй болоод хэр удаж байна вэ?

-Ойролцоогоор нэг сар болж байна. 

-Яагаад дуучин Х.Бат-Ундралыг хамтлагаасаа гарсныг өнөө хэр нь нууцалсан юм бэ?

-Нууцалсан зүйл байхгүй. Ер нь бол уран бүтээлээрээ дамжуулж хамтлаг маань гурван гишүүнтэй болсон шүү гэдгийг хэлчихсэн. Хэрэв сайн анзаарсан бол шүү дээ. Бид ч гэсэн үзэгч, фэнүүдээ мэдэж байгаа л гэж бодсон. 

-Тэгэхээр Япон Улсад хийсэн аялан тоглолтдоо гурвуулаа явсан нь ийм учиртай байсан юм уу?

-Тийм ээ. Одоо бид гурвуулаа уран бүтээлээ туурвиж байгаа.

-Гэхдээ дуучин Х.Бат-Ундралын хамтлагаа орхих болсон шалтгаан нь юу байв?

-Ер нь бол албан ёсоор хамтлагаасаа гарсан. Тухайн хүний сонголт л доо. Ажил, амьдралын шаардлагаар л хамтлагаасаа гарах хүсэлт тавьсан. Бид ч найзынхаа хүсэлтийг хүндэтгэн хүлээж авсан гэж ойлгож болно. 

-Тэгвэл түүнийг хар тамхины хэрэгт холбогдсон талаарх мэдээллийг авсан биз дээ?

-Тийм ээ. 

-Үнэхээр хар тамхины хэрэгт холбогдчихсон гэдэг нь үнэн үү?

-Хэвлэлээр шуугиад байгаа шиг их хэмжээний хар тамхи оруулж ирээд зарах гэж байгаад баригдсан гэх мэдээлэл ташаа юм шиг байсан. 

-Тийм гэж үү?

-Үнэндээ бид үнэн, худал эсэхийг нь яг таг хэлж мэдэхгүй байна. Энэ талаар хууль, хяналтын байгууллагаас олон нийтэд үнэн, зөв мэдээллийг нь өгөх байх гэж бодож байна. 

-Өршөөгөөрэй, таны хариулт нэг хөндий, хүнийрсэн өнгөтэй санагдаж байна. Үнэхээр хамтлагаасаа гарсан нь өөр ямар нэгэн шалтгаангүй биз дээ?

-Х.Бат-Ундрал маань хамтлагаасаа гарсан хэдий ч найз маань. Бидний найз нөхдийн холбоо хэвээрээ байгаа. Мэдээж найз нөхрийн хувьд яг юу болсон талаар араас нь асууж, сурагласан.

-Тэгээд ямар мэдээлэл авав?

-Яг хэвлэлд бичээд байгаа шиг зүйл болоогүй гэдгийг л сайн мэдэж байна. 

-Ингэхэд танай хамтлаг өмнө нь ч бас хар тамхины хэрэгт холбогдож байсан санагдана?

-Манай хамтлагийн нэг ч гишүүн хар тамхины хэрэгт холбогдож байгаагүй. Тэр шалгагдаж байсан гэх асуудал 10 гаруй жилийн өмнөх зүйл шүү дээ. Тухайн үед хип хоп урсгалаар уран бүтээлээ туурвидаг хамтлаг, дуучид хар тамхи хэрэглэдэг гэх мэдээлэл гарч эхэлсэн. Манай хамтлагийг ч мөн шалгасан. Зүгээр л дайрлагад нь өртсөн гэж ойлго. Түүнээс өөр бидэнд хар тамхитай холбоотой түүх байхгүй. 

-Ийм учиртай байж. Гэхдээ л танай хамтлагийнхныг мэр сэр "хар тамхи" гэх үг дагаж явдаг шүү дээ?

-Тийм. Хэвлэл мэдээллийн нэг хэцүү зүйл нь нэг хүнийг сэжигтнээр шалгасан тохиолдолд хэрэгтэн мэт үздэг. Тэрнээс хойш хамтлагийн нэр дээр муу юм наалдчихаад салахгүй байна. Дээр нь энэ хууль, хяналтынхан ялангуяа уран бүтээлчдийн нэр хүндэд халдахдаа болгоомжтой байх ёстой юм. 

-Ойлгосонгүй?

-Олон нийтийн дунд урлагийнхан хар тамхи хэрэглэдэг гэх сөрөг мэдээлэл бий болоод удаж байна. Тэр нь эргээд бидний уран бүтээлд нөлөөлж байна шүү дээ.

-Сөргөөр үү?

-Мэдээж, тийм. 

-Ойлголоо. Хоёулаа энэ сэдвийг ингээд орхих нь зөв байх. Ирэх онд хамтлагийн тань 20 жилийн ой болно. Хэдий гурвуулаа ч гэсэн шинэ уран бүтээлдээ оржээ. Шинэ клип гаргасан байна. Сүүлийн үеийн уран бүтээлийнхээ сонин сайхнаасаа хуваалцахгүй юу?

-Манай хамтлаг "Goodluck" хэмээх шинэ уран бүтээлээ танилцууллаа. Дөнгөж сарын өмнө "The love" гэх шинэ клипээ үзэгчдэд хүргэсэн байгаа. Сүүлийн үед гарч байгаа шинэ уран бүтээл бүхэн саундтрэк эсвэл ямар нэг улс төрийн зорилго агуулгатай уран бүтээлүүд гарч байна. 
Тиймээс бидний зүгээс сонсогч фэнүүддээ цэвэр уран бүтээлээр үйлчлэх зорилгоор уран бүтээлүүдээ хийж байгаа. 

-Сүүлд гаргасан "The love" дуугаараа залууст хайрлах сэдлийг өгсөн. Харин "Goodluck" дуугаараа сонсогч фэнүүддээ ямар мэдрэмжийг өгөхийг зорив?

-Амьдралын өнгөлөг гэрэл гэгээтэй талыг харуулах, гэрэлтэй амьдралд уриалан дуудах зорилго агуулсан. Тиймдээ ч дууныхаа клипэнд нийгэмдээ өөрийн хичээл зүтгэлээр салбартаа амжилттай яваа, тив дэлхийд нэрээ гаргасан тийм амжилттай залуусыг оролцуулж хамтран дуулсан. 

-Пөөх, сайхан мэдээ байна шүү?

-Хамгийн гол нь, энэ клипийг үзээд залуус маань бахархан дууриах сэдлийг олж аваасай гэж хүсч байна. Амжилттай амьдрахын тулд хүн өөрөө хичээх хэрэгтэй. Хичээвэл бүх зүйл болдог юм шүү гэдгийг харуулахыг хүссэн дээ.

-Хэзээ үзэгчдийн хүртээл болох вэ?

-Төлөвлөгөө ёсоор өнгөрөгч баасан гарагт шинэ клипнийхээ нээлтийг хийж, үзэгчдийн хүртээл болгох байсан. Даанч хамтлагийн экс гишүүнтэй холбоотой таагүй мэдээлэл олон нийтэд цацагдаж эхэлснээс үүдэн үйл ажиллагаагаа хойшлуулаад байсан юм. Ямартай ч өнөөдрөөс /өчигдөр/ албан ёсоор уран бүтээлээ нээж байна. Гэхдээ ирэх сарын 3-нд олон нийтэд цацаж эхэлнэ.

-Ярилцсанд баярлалаа.

Эх сурвалж: