2012 оны сонгуулиар байгуулагдсан НИТХ хаалтын хуралдаанаа хийсэнтэй холбогдуулан Нийслэлийн Иргэдийн Хурлын төлөөлөгч Б.Түвшинтэй уулзаж ярилцлаа.
-Саяхан НИТХ хаалтын хуралдаанаа хийж өнгөрсөн хугацаанд хийж бүтээсэн ажлаа дүгнэн, иргэд сонгогчдодоо тайлагналаа. Энэ талаар яриагаа эхлэх үү?
-Өнгөрсөн дөрвөн жилд НИТХ нийслэлийн иргэдийн ая тухтай, аюулгүй орчин нөхцөлд амьдрах бололцоог хангах, хотын зам тээвэр, дэд бүтцийг сайжруулах, гэр хорооллыг дахин төлөвлөж, иргэдийн төлбөрийн чадварт нийцсэн орон сууцын хөтөлбөр боловсруулах, тодорхой зорилтот бүлгийг дэмжих, төрийн үйлчилгээг иргэн төвтэй орчин үеийн жишигт хүргэж, хөнгөн шуурхай болгоход чиглэсэн ил тод, нээлттэй бодлого баримтлан ажилласан. Энэ бодлого нь нийслэлийн иргэдийн эрх ашгийг хамгаалсан, бүтээн байгуулалтын эрс шинэчлэл хийсэн олон чухал ажлын суурь болсон төдийгүй, хотын иргэдийн сэтгэлгээнд хийсэн хувьсгал болж чадлаа.
-Эдгээр ажлыг нийслэлчүүд маань нүдээрээ харж, биеэрээ мэдэрч байгаа. Хийсэн ажлуудын тань эхлэл юу байв?
-Ажлуудын маань эхлэл юу байв гэхээсээ өмнө нийслэлийн удирдлагууд чухам яагаад эдгээр ажлуудыг хийх болсон тухай эргэн санах нь зөв болов уу. Дөрвөн жилийн өмнө нийслэлийн авто замын түгжрэл дээд цэгтээ хүрсэн, зорчигчид шахцалдан дайрч суудаг, ороод мөнгө төгрөгөө төлсөн, төлөөгүй гээд кондуктортой зөрчил үүсгэдэг, жолооч нар нь уралдаж давхидаг, микро автобусууд хүнээ хэтрүүлэн чихдэг, зам тээврийн осол гаргадаг гээд олон асуудалтай байсан. Нэг үгээр иргэддээ үйлчилдэг биш, чимхдэг кондуктортой, чихдэг ачдаг нийтийн тээвэртэй байсан, одоо больсон. Нийслэлийн иргэд маань автобусанд ухаалаг картаар үйлчлүүлж, урд хаалгаараа сууж хойгуураа бууж хэвшлээ. Энэ ажлыг иргэд ойлгон дэмжээгүй бол хэрэгжихгүй л байсан. Иргэд маань олон тогтсон, хэвшсэн буруу зуршлаасаа татгалзан их хотын соёлтой үйлчилгээг хүлээн зөвшөөрсөн нь сэтгэлгээний хувьсгал мөн.
Гудамж, талбай нь гэрэлгүй, шавар шавхайтай, хогонд дарагдсан, харанхуй гудамжинд иргэд халдлагад өртөх нь бараг нийтлэг үзэгдэл болсон, төрийн үйлчилгээнд хүнд суртал гаарсан гэх зэргээр тоочоод байвал олон зөрчилтэй асуудал он удаан жилээр бугшсан байсан. Ийм байдлыг бид багаараа хэлэлцээд юуны түрүүнд тогтолцооны өөрчлөлт буюу эрс шинэчлэл хийх нь зүйтэй гэж үзсэн. Ингээд бид НИТХ-ын хамгийн эхний хуралдаанаараа авто замын түгжрэлийг бууруулах тухай хэлэлцсэн. Асуудлыг ч шууд шуурхай шийдвэрлэж эхэлсэн. Та бүхний сайн мэдэх дугаарын хязгаарлалт, нийтийн тээврийн хэрэгсэлд зориулж замын нэг дүгээр эгнээг чөлөөлөх зэрэг ажлуудыг амжилттай хэрэгжүүлсэн.
-Анхны хуралдаанаас сүүлчийн хуралдаан хүртэлх хугацаанд НИТХ гаргасан шийдвэрүүдээ эцэст нь хүртэл хэрэгжүүлж чадсан уу?
-Ямар ч гэсэн бид зорьсон ажлаа шат дараатай хэрэгжүүлсэн. Зөв тогтолцоо, зөв төлөвлөлт хамгийн чухал нь байсан. Тухайлбал, ухаалаг хот буюу ухаалаг засаглалыг хэрэгжүүлэх, нийслэлийн иргэдэд төрийн үйлчилгээг ил тод, хурдан шуурхай хүргэх ажлыг эрчимтэй өрнүүллээ. Гол нь бид хот бол үйлчилгээний байгууллага байх ёстой, хот асуудлыг шийдвэрлэхдээ иргэдээсээ асуудаг, хотын шийдвэр иргэдэд ил тод байх ёстой гэсэн зарчмаар ажиллаж ирсэн.
Үүнийг хөндлөнгөөс дүгнэхэд энгийн ойлгомжтой мэт боловч өмнө нь бидний туулж ирсэн гарын үсэг цуглуулж гүйдэг, хэн нэгэн төрийн ажилтныг царайчилдаг тогтолцоог эрс өөрчилсөн хувьсгал болсон гэж миний хувьд үздэг. Дүнжингарав, Мишээл экспо, Драгон төвүүдэд ажиллаж байгаа нэг цэгийн үйлчилгээний төвүүдийг иргэд одоо сайн мэддэг болсон. Үүгээр үйлчлүүлсэн иргэд ч энэ ажлыг төрийн үйлчилгээний эрс шинэчлэл болсон гэж хүлээн зөвшөөрч байгаа.
-Иргэдээ ажлын байраар хангах, тодорхой зорилтот бүлгийг дэмжин ажиллах чиглэлээр ямар асуудлыг шийдвэрлэв. Энэ талаар жаахан тодруулаач?
-Иргэдээ ажилтай, орлоготой байлгах нь хотын удирдлагын багийн ажлын бас нэг чиг үүрэг юм. Энэ тухай бид мөрийн хөтөлбөртөө ч тусгайлан зааж өгч, хэрэгжүүлэхийн төлөө олон шат дараатай ажлуудыг хийсэн.
Нийслэлийн түүхэнд Шинэ өрөм ч сайхан шүү анх удаа хороо бүрт 50-200 сая төгрөгийн сан байгуулж, бизнес эрхлэгч иргэдээ дэмжлээ. Ингэснээр бичил бизнес эрхлэгчдийг тогтмол орлоготой, тогтвортой үйл ажиллагаа явуулахад нь дэмжлэг болсон. Нөгөөтэйгүүр энэ нь үндэсний үйлдвэрлэлийг хөгжүүлэхэд маш чухал түлхэц болсон. Энэ ажилд нийслэлийн 129 хороо хамрагдсан. Бичил зээлд хамрагдсан иргэд хороондоо хадгаламж зээлийн хоршоо байгуулж ажилласан. Энэ зээлийн хүрээнд 2685 төсөлд 10,9 тэрбум төгрөгийн санхүүжилт олгож, 4985 ажлын байр шинээр нэмэгдсэн гэдгийг нэмж хэлмээр байна.
-Дөрвөн жилийн хугацаанд өмнөх нийгмээс уламжилсан хөшиж царцсан олон хөндүүр сэдвийг барьж авч шийдвэрлэсэн гэж ойлгож болох уу?
-Дөрвөн жил гэдэг өнөөгийн хөгжлийн хурдаар авч үзвэл бага хугацаа. Гэхдээ хийе бүтээе гэсэн хүнд юуг ч амжуулж болох хугацаа юм гэдгийг бидний хийж хэрэгжүүлсэн ажлаас харж болох байх. Бид нийслэл хотоо дэлхийн жишигт хүргэж хөгжүүлэх зорилт тавин ажиллаж, энэ хүрээнд нийт 108 бүтээлч, шинэлэг ажлыг хийсэн байна. Улаанбаатар хотод өмнөх 20 гаруй жилийн турш яриад ч хийж чадаагүй ажлуудыг бид амжуулсан. Одоо иргэд маань хотын иргэний хувьд нийтийн өмчийг хайрлаж хамгаалдаг, үүрэг хариуцлагаа ухамсарладаг, хийсэн тохижилт, бүтээн байгуулалтын ажлуудыг маань дэмждэг болсон. Иргэдийн энэ дэмжлэгээр хийсэн ажлуудын маань үр өгөөж нэмэгдсээр байгааг харахад таатай байна.
-Ярилцсанд баярлалаа.
