Энэ зууны хамгийн аймшигтай мангас хэмээгддэг Колумб улсын хувьсгалт босогчдын ФАРК бүлэглэл эрх баригч Засгийн газартай гал зогсоох гэрээ байгууллаа. Удтал хүлээсэн түүхэн үйл явдлыг тэмдэглэн хоёр талын тэргүүлэгчид гар барилцжээ. Ингэснээр хоёр талын хооронд хагас зуун жил тасралтгүй үргэлжилсэн мөргөлдөөн намжиж, улс орны хэмжээнд энх тайван тогтох сайн талтай юм. Гэхдээ энэ удаагийн гал зогсоох гэрээ нь Колумб улс даяар бүрэн энх тайван байдал авчрахад шаардлагатай хэд хэдэн шат дараалласан алхамын төгсгөл нь гэж ойлгож болно. Орон нутгийн хэвлэлүүдийн мэдээлснээр хэлэлцэгч талууд тун удахгүй бүрэн шийдвэрт хүрэхээр төлөвлөж буй гэнэ.
Дэлхийн бөмбөрцөгийн баруун хойд хэсэгт 50 гаруй жил үргэлжилсэн хоёр талын зөрчилдөөнөөс болж, 220 мянган хүн амиа алдаж, долоон сая хүн орон гэрээсээ дайжсан юм. Эрх баригчид хийгээд босогчдын хооронд энхийн гэрээ байгуулах ажил анх гурван жилийн өмнө Куба улсын нийслэл Гавана хотод эхэлж байсан түүхтэй
Колумбын Ерөнхийлөгч Хуан Мануэл Сантосын мэдээлснээр дайныг бүр мөсөн зогсоох эцсийн гэрээг ирэх сарын сүүлээр байгуулахаар талууд ярилцаж байгаа гэв. Гал зогсоох гэрээ байгуулснаар ФАРК-ын дайчид 180 хоногийн дотор зэр зэвсгээ хураалгаж, эцсийн энхийн гэрээг байгуулна. Хувьсгалт бүлгийн 7000 гаруй дайчдыг нийгэмшүүлэхийн тулд түр хугацаанд оршин суух тусгай бүсийг байгуулах, тус бүсэд энгийн иргэд нэвтрэхийг хориглож, бууж өгсөн босогчдын аюулгүй байдлыг хамгаалах зэрэг ажлыг хийнэ.
С.Дамдин
