Хойд Солонгосын залуу охидыг хил дамнуулан зарах үзэгдэл газар авчээ. Энэ талаар Британийн “ВВС” агентлаг мэдээллээ.
Цөмийн хөтөлбөр, баллистик пуужингийн үйлдвэрлэлээс болж, олон улсаас шахагдаж буй Хойд Солонгос улсын дотоодын нөхцөл байдал өдрөөс өдөрт доройтож байна. Тус улсад өлсгөлөн газар авсан талаар Өмнөд Солонгосын Засгийн газар мэдэгдэж, өнгөрөгч долоо хоногоос хүмүүнлэгийн буцалтгүй тусламж үзүүлж эхэлжээ.
Пхеньян 2017 онд зургаа дахь удаагаа цөмийн туршилт хийсний хариуд НҮБ түүхэндээ байхгүй хатуу хоригийг тус улсын эсрэг хэрэгжүүлж эхэлсэн юм.
Энэхүү хоригт Хойд Солонгост үзүүлэх бүх төрлийн хүмүүнлэгийн тусламжийг хориглосон. Харин Сөүл “Аргагүй нөхцөл” гэх шалтгаанаар дээрх тусламжийг үзүүллээ.
Хойд Солонгосын удирдагч Ким Чен Ун улс даяар нүүрлээд өлсгөлөнг зогсоох зорилгоор аюулгүй байдлаа эрсдэлд оруулан байж БНХАУ, Сингапур, Вьетнам, ОХУ-д айлчилсан ч гол зорилгоо биелүүлж чадалгүй нутаг буцсан юм. Удирдагчийн айлчлалын гол зорилго улсынх нь эсрэг хэрэгжүүлж буй хоригийг бүрэн цуцлах, эдийн засгийн хямралаас гарахад нь туслах байжээ.
Хойд Солонгосын эдийн засаг суларч, иргэд амьдрал ахуйгаа дээшлүүлэхийн тулд харийн нутагт хүнд хөдөлмөр эрхлэх нь хэвийн үзэгдэл болов.
Сайныг дагаад саар гэгчээр энэ бүхэнтэй зэрэгцэн Хойд Солонгосын охид бүсгүйчүүдийг хил давуулан худалдах, биеийг нь үнэлүүлэх хууль бус үйл ажиллагаа цэцэглэн хөгжиж буй талаар эмэгтэйчүүдийн эрхийн “London-based rights group” байгууллагаас мэдэгдлээ.
Хойд Солонгосын “түшигтэй ах” гэгддэг БНХАУ-д солонгос охидыг бараа, бүтээгдэхүүн мэт хар зах дээр зарж, гэмт этгээдүүд хөлжиж эхэлжээ.
Харийн нутагт бэлгийн боолчлолд өртөж буй солонгос охид ердөө 12-29 насныхан гэнэ. Энэ охидыг ихэвчлэн хулгайлж Хятадад авчирдаг талаар тус байгууллагын тайланд дурджээ. Нас залуу, эрүүл чийрэг байх тусмаа өндөр үнээр зарагддаг гэнэ.
Албаны бус эх сурвалж “Нэг охиныг ойролцоогоор 4-5-хан доллараар зардаг. Хятадууд ердөө 1000 юаниар эхнэртэй болчихдог” гэж ярьжээ.
Хүн худалдаалах гэмт хэрэг жилд 100 сая ам.доллараар хэмжигддэг бөгөөд биеэ үнэлэлт илүү ашигтай байдаг. Уг мөнгөн дүнг харахад жилд хамгийн багадаа 1000-2000 солонгос охин харийн нутагт зарагдаж байна. Зарим охидыг интернэтийн тусламжтай хил дамнуулан зардаг гэнэ.
Өмнө нь гэр бүлтэй байсан эмэгтэйчүүд 500 юанийн үнэд хүрдэг аж. Солонгос охидыг хятадуудаас гадна өмнөд солонгосчууд ихээр сонирхож, худалдан авдаг байна. Охид нутагтаа очвол шууд цаазлуулах аюултай учир үлдсэн амьдралаа хэн нэгний эрхшээлд өнгөрүүлэх нь элбэг аж.
Дүрвэгсдийн байранд байхдаа бусдад зарагдаж, олон сарын турш хүчээр биеэ үнэлсэн хоёр эмэгтэй өнгөрөгч онд нууцаар оргож байжээ. Гэхдээ тэднийг эзэд нь хэрцгийгээр шийтгэж, бусдад дамнан худалдаалсан гэх мэдээлэл бий.
“Хойд Солонгосын олон охин харийн нутагт бэлгийн хүчирхийлэлд оршин байна. Тэднийг улс нь хаясан. Охид эрүүл, зөв орчинд өсөн торних ёстой байтал хэн нэгний мөнгө олох хэрэгсэл болж буйд үнэхээр харамсч байна. Тэднийг улс нь тоохгүй учир НҮБ анхааралдаа авах учиртай” гэж “London-based rights group” мэдэгджээ.
Хятадад бэлгийн боолчлолд байсан нэгэн солонгос эмэгтэй “Надаас гадна найман охиныг нэг жижигхэн харанхуй өрөөнд хорьж байсан. Бидэнд ямар ч хоол өгдөггүй байсан. Заримдаа ямар ч шалтгаангүйгээр зоддог байсан. Хамгийн залуухан дөрөв нь зарагдсан” гэж ярьжээ.
Өмнөд Солонгосын хүний эрхийн байгууллагууд уг асуудалд анхаарлаа хандуулан Өмнөд болон БНХАУ-д зарагдсан охидтой холбогдож, хохирогчдыг тогтоохоор ажиллаж эхэлжээ.
Б.Дэлгэрцэцэг
