УИХ-ын гишүүн Ц.Анандбазар өөрийн хамаарал бүхий компаниудад ажилладаг охид, эмэгтэйчүүдэд ажлын байрны давуу байдлаа ашиглан хүч хэрэглэн бэлгийн дур хүслээ ёс бусаар хангадаг, ажлын байрны бэлгийн дарамт үзүүлдэг, хүчиндсэн гэх хэргүүдийг “Цахиур” эрэн сурвалжлах нэвтрүүлэг өнгөрсөн дөрөвдүгээр сард олон нийтэд хүргэсэн. Нэвтрүүлгийн мөрөөр ЦЕГ-ын Мөрдөн байцаах албанаас
5-6 мөрдөгчийн бүрэлдэхүүнтэй ажлын хэсэг гарч, зургаан сар орчим мөрдөн шалгасан. Тэгвэл шалгалтын ажиллагаа дуусчээ. Тодруулбал, цагдаагийн байгууллагаас “Ц.Анандбазарыг яллагдагчаар татах” саналыг прокурорын байгууллагад ирүүлсэн байна. Тодруулбал, Ц.Анандбазар нь “хүчиндэх” гэмт хэрэг үйлдсэн нь цагдаагийн хянан шалгах ажиллагааны үр дүнд тогтоогджээ.
Ц.Анандбазарыг Эрүүгийн хуулийн тусгай ангийн 12.1-д зааснаар зүйлчилсэн бөгөөд уг зүйл заалт нь:
“АРВАН ХОЁРДУГААР БҮЛЭГ
ХҮНИЙ БЭЛГИЙН ЭРХ ЧӨЛӨӨ, ХАЛДАШГҮЙ БАЙДЛЫН ЭСРЭГ ГЭМТ ХЭРЭГ
12.1 дүгээр зүйл.Хүчиндэх
1.Хохирогчийн хүсэл зоригийн эсрэг хүч хэрэглэж, хүч хэрэглэхээр заналхийлж, эсхүл сэтгэцийн өвчтэй, согтуурсан, мансуурсан, сэтгэцийн үйл ажиллагаа нь түр сарнисан, бусад өвчний улмаас биеэ хамгаалах, эсэргүүцэл үзүүлэх чадваргүй, эсхүл эд хөрөнгө, албан тушаал, бусад нөхцөл байдлын улмаас эрхшээлдээ байгааг далимдуулан хүчээр бэлгийн харьцаанд орсон, эсхүл бэлгийн харьцааны шинжтэй хүч хэрэглэсэн үйлдэл хийсэн бол нэг жилээс таван жил хүртэл хугацаагаар хорих ял шийтгэнэ” хэмээн хуульчилжээ.
Цагдаагийн мөрдөн шалгах ажиллагаа ийнхүү дуусаж, прокурорын байгууллагад ирснээр тухайн саналын дагуу Прокурорын байгууллагаас Ц.Анандбазарыг яллагдагчаар татан, мэдүүлэг авах үйл явц өрнөнө. Харин УИХ-ын гишүүний халдашгүй дархан байдлынхаа хүрээнд “мэдүүлэг өгөхгүй” гэдгээ мэдэгдвэл түүнийгээ бичгээр илэрхийлэх учиртай. Энэ тохиолдолд Прокурорын байгууллага тухайн хэргийг шууд шүүх байгууллагад шилжүүлэх процесс явагдана. Харин нөгөө талаас Прокурор цагдаагийн байгууллагын саналыг хэрэгсэхгүй болгон, хэргийг хаах ч боломж бий.
Өөрөөр хэлбэл, олон эмэгтэйчүүд, охид бүсгүйчүүдийг бэлгийн дарамтад оруулсан, хүчиндсэн нь цагдаагийн шалгалтаар тогтоогдсон энэ хэргийг хэрхэн шийдэх нь өдгөө Прокурорын байгууллагаас хамаарахаар болоод байна.
Хэргийг шалгаж эхэлснээс хойш өнөөдрийг хүртэл өнгөрсөн зургаан сарын хугацаанд Ц.Анандбазарын бэлгийн дарамтад өртсөн нэг хохирогч эмэгтэй амиа хорлохыг завдаж, цагдаагийн байгууллагын тусламж, хамгаалалт авсан, бас нэгэн хохирогч эмэгтэй тодорхойгүй шалтгаанаар гомдлоо буцаан татахаар удаа дараа прокурорын байгууллагад өргөдөл гаргасан зэрэг асуудлууд үүссэн юм. Эдгээр үйл явдлаас харвал, хэрэгт холбогдоод буй УИХ-ын гишүүн Ц.Анандбазар хохирогч эмэгтэйчүүдийг айлган сүрдүүлсэн, дарамталсан, нөгөө талаас мөнгө төгрөг амласан ч байж болох нөхцөл байдлууд бий болоод байна.
Мөн нэвтрүүлэгт оролцож, Ц.Анандбазарын хүчирхийлэлд өртсөн талаараа ярилцлага өгсөн нэгэн эмэгтэйд “Гурван сая төгрөг өгье. Цагдаад мэдүүлэг өгөхдөө нэвтрүүлэгт ярьснаасаа өөрөөр хэлчих” хэмээн ойр дотных нь хүнээр дамжуулан хэлүүлж, шахалт үзүүлсэн талаар бид өмнө мэдээлж байсан билээ.
Эх сурвалж: Tsahiur.mn
