Монгол улс жил бүр авлигын индексээр ухарсан үзүүлэлттэй гарсаар байна. Энэ жилийн байдлаар дэлхийн 180 орноос 121-р байрт эрэмбэлэгдэх болсон. Үүнийг эрх баригчид, Ерөнхий сайд тайлбарлахдаа авлигачидтай тэмцэж, авлигын хэргүүдийг сөхөн гаргаж, ил болгож байгаатай холбон тайлбарлаж буй.
Ерөнхий сайд Л.Оюун-Эрдэнэ "Улаанбаатараас ярьж байна" нэвтрүүлгийнхээ үеэр авлигын асуудлыг хөндөн ярихдаа Шүүхийг буруутгаж ярьсан. Тэрбээр "Хөшигний ард улс төрчид ард түмнээсээ хулгайлж ирсэн булхайг бид дэлгэсэн. ЖДҮ, БЗС, Хөгжлийн банк, нүүрс гээд олон хулгай ил болсон. Эхнээсээ шүүхэд шилжиж авлигын системийг угсарсан хүмүүс шүүхэд гүн гараа дүрчихсэн байгаа тул хэрэг нь эцэслэгдэхгүй байна." гэсэн. Мөн уг нэвтрүүлгийн үеэр Хөгжлийн банкны хэргээс 27 хүнийг цагаатгасан шүүхийг буруутгасан. Нэр бүхий намынхаа улс төрчид болох Ё.Баатарбилэг, Г.Амартүвшин, Х.Ганхуяг, Г.Дамдинням нарын нэрсийг ил зарлачихсан. Өөрөөр хэлбэл Ерөнхий сайд авлигач гэж үзээд тэмцтэл шүүх түүний тэмцлийг үгүй хийсэн үйлдэл гэж Ерөнхий сайд үзээд байна. Ногоон автобусны хэрэгт холбогдсон Ж.Сүхбаатар, Анхан шатны шүүхээс ялын тогтоол уншуулчихаад яваа Б.Энх-Амгалан, нүүрсний хэрэгт холбогдсон, БЗС-ийн хэрэгт холбогдсон олон улс төрчид нам дотор нь тэр бүү хэл Засгийн газрын танхимд нь ч сууж л байна. Тэгвэл Ерөнхий сайдад өөрт нь авлигачидтайгаа өөрөөр тэмцэх боломж нь байгаа. Энэ бол намын дүрэм.
2021 оны 12-р сарын 07-ны өдрийн МАН-ын 30-р их хурлаар өөрчлөн найруулсан намынх нь дотоод дүрэм бий. Уг дүрэмд нам дотроосоо авлигатай тэмцэх заалт нь тов тодорхой бий. Тодруулбал 34.6-д нь "Дараах тохиолдолд Хяналтын ерөнхий хорооны тогтоолоор гишүүнчлэлийн эрхийг хугацаатай болон хугацаагүйгээр түдгэлзүүлнэ." гээд заачихсан. 34.6.3-д нь авлигын гэмт хэрэгт холбогдсон бол намын гишүүнчлэлээс түдгэлзүүлэх тухай тодоор биччихсэн байна. Ял сонссон бол гэж бичээгүй. Холбогдсон бол гэж дахин тодотгон хэлье. Тэгэхээр Ерөнхий сайд та шүүхийг зүхэж суухаар өөрөө намын дүрмээ эхлээд мөрдүүлчих л дээ. Авлигын хэрэгт холбогдсон хүмүүсээ намаасаа түдгэлзүүлээд, хөөгөөд харуулах юм бол ард түмэн чинь энэ хүн үнэхээр авлигатай тэмцээд байгаа юм байна гэж итгэх байх даа.
