БНХАУ-д тавдугаар сарын 1-5-ны хооронд Хөдөлмөрийн өдрийн баяр тохиодог. Тэдгээр өдрүүдэд хятадууд дотооддоо аялж, амардаг юм.

Тус улсын засгийн газар энэ жилийн Хөдөлмөрийн баяраар аялал, хөл хөдөлгөөн нэмэгдсэн гэж мэдээлсэн ч аялагчид зардлаа танасан байна. Энэ нь дэлхийн хоёр дахь хамгийн том эдийн засагтай тус улсад иргэдийн хэрэглээ сул байгааг харуулж буй.

Гэвч Хөдөлмөрийн баярын дараа ажилчид амарсан өдрүүдээ бямба, ням гарагуудад ажиллаж нөхдөг юм. Амарсан өдрөө нөхөж ажилладаг бодлогыг БНХАУ Азийн санхүүгийн хямралын дараа иргэдийн хэрэглээг нэмэх зорилгоор 1999 онд нэвтрүүлж байсан.

Хятадын засгийн газар удааширч буй эдийн засгаа дэмжихээр ажиллаж буй. Үүний тулд иргэдийн хэрэглээг ихэсгэх хэрэгтэй юм. Хэрэглээ сул байна гэдэг нь иргэд бараа, үйлчилгээ худалдан авахыг багасгаж бизнесүүдийн орлого буурах тул эдийн засагт сөрөг нөлөөтэй.

БНХАУ-ын Соёд, аялал жуулчлалын яам даваа гарагт /2024.05.06/ мэдэгдэл хийхдээ баярын өдрүүдээр иргэд 295 сая аялал хийсэн гэжээ. Энэ нь 2019 оны Хөдөлмөрийн өдрийн баярын үеэр хийсэн аяллын тооноос 28 хувиар өссөн үзүүлэлт юм.

Харин энэ жилийн баяраар хийсэн аялал жуулчлалын орлого 166.89 тэрбум юань (23.6 тэрбум ам.доллар) болсон нь 2019 оны түвшнээс 13.5 хувиар илүү хэмжээ.

Өөрөөр хэлбэл аялагчдын дундаж зардал гурван хувиар буурч 565.73 юань (265 мянган төгрөг) болсон байна.

БНХАУ-ын бокс оффист үүнтэй ижил зүйл ажиглагджээ. Тухайлбал бүх нийтийн амралтын өдрүүдээр 37.77 сая хүн кино театраар үйлчлүүлсэн нь 2019 оны 35.09 саяас давсан үзүүлэлт байв. Гэвч театруудын орлого 2019 оныхтой ижил буюу 1.527 тэрбум юань хүрчээ.

Энэ нь БНХАУ-ын эдийн засаг суларч, өсөлт удааширч буй нөхцөл байдалд хэрэглэгчид зардлаа танаж буйг харуулж байгаа юм.

Эх сурвалж: CNN