Увс аймгийн Өлгий суманд аавтайгаа хонь хариулж явсан 13 настай охин аавынхаа хамт хонио хариулж явж байхдаа чононд бариулж, тухайн нөхцөлд өөрийн овсгоо самбаагаараа амьд гарч чаджээ.

Бид уг мэдээллийн дагуу Увс аймгийн Өлгий сумын засаг даргын орлогч З.Моломжамцаас тодрууллаа. Тэрбээр, "Чонотой нүүр тулсан охиныг Н.Удвал гэдэг. Охин 13 настай тавдугаар ангийн хүүхэд. Уг үйл явдлын тухай ярихад, Охин тав дахь өдөр хичээлээ тараад хөдөө гэртээ очоод энэ үйл явдалд өртсөн байгаа юм.

Энэ үйл явдал тавдугаар сарын 11-ний өдрийн 13:00-15:00 цагийн хооронд "Шивээн гол" гэдэг газар аавтайгаа малаа усалж явахад нь галзуу чоно мал руу нь дайраад, тэгэж байтал хүүхэд рүү нь бас дайраад аав нь хурдан арга хэмжээ авч салгасан байсан.

Одоогоор аавынх нь биеийн байдал тогтвортой. Харин хүүхдийн биеийн байдал хүнд байсан учир бидний зүгээс шуурхай арга хэмжээ авч, аймгийн төвийн эмнэлэг рүү хүргэсэн. Манай сумын удирдлагууд цаг тутамд хүүхдийн биеийн байдлыг асууж байгаа “Н.Удвал охин очсон даруйд нь яаралтай вакцин, тариа хийж бусад эмчилгээгээ хийсэн. Охины хүзүү, гар, мөр зэрэг биеийн хэсгүүддээ шархтай. Мөн хазуулсан гаранд гурван оёдол тавьсан. Одоогоор бол харьцангуй тогтвортой болсон байна” гэсэн сүүлийн мэдээлэл ирсэн.

Чонын хувьд уг үйл явдал болсноос хойш зугтаад алга болсон. Бид тэр чоныг барьж арга хэмжээ авна гэсэн ойлголт байхгүй. Яагаад гэвэл дээрээс тусгай чиглэл авч байж цаашдын арга хэмжээгээ авах ёстой юм л даа. Гэхдээ одоо бол хаана байгаа эсэх нь тодорхойгүй.

Охины бидэнд хэлэхдээ, “Хонь усалж байтал мал гэнэт үргэсэн. Хойшоо хартал юу ч харагдахгүй байсан хэрнээ гэнэт чоно гараад ирсэн. Урд талынхаа хоёр хөлийг миний мөрөн дээр тавиад зүүн талын мөрийг маань хазах гэж оролдсон. Тэгэхээр нь би баруун гараараа цохьсон юм. Гэтэл миний гарыг хазчихсан. Би дахин дахин цохиж, аавыгаа дуудсан. Аав уурга, чулуу шидсэн” хэмээн ярьж байсан юм.

Eguur.mn