Өмнөд Солонгост ажил, амьдралын тэнцвэрийг сайжруулах асуудлаар Засгийн газар, ажилтан, ажил олгогч гурван талын оролцсон яриа хэлэлцээ хийхээр төлөвлөж байгаа ажээ. Ажилтнуудыг Солонгосын Үйлдвэрчний эвлэлүүдийн холбоо (FKTU), ажил олгогчийг Солонгосын аж ахуйн нэгжүүдийн холбоо (KEF) болон бусад бизнесийн лобби бүлгүүд төлөөлөхөөр болжээ. Одоо тус улсад долоо хоногийн ажлын нийт цагийг 52-оор хязгаарлах, үүний 40 нь үндсэн ажлын цаг, 12 нь илүү цаг байх хууль үйлчилж байгаа. Гэхдээ энэ хязгаарлалт ажил, амьдралын тэнцвэрийг хангах үндсэн зорилгоо биелүүлж чадахгүй байна гэж үздэг. 2022 онд нэг солонгос хүн дунджаар 1,901 цаг ажилласан нь Эдийн Засгийн Хамтын Ажиллагаа, Хөгжлийн Байгууллагын (OECD) гишүүн орнуудын дунджаас 149 цагаар илүү байгаа юм. Засгийн газар болон бизнесийн төлөөлөл одоогийн ажлын долоо хоногийн системийг илүү уян хатан болгож өөрчлөх саналтай байна. Дөрөвдүгээр сарын 10-нд болсон бүх нийтийн сонгуулийн сурталчилгааны үеэр Солонгосын гол сөрөг хүчин Ардчилсан нам ажлын дөрвөн хоногтой болох тогтолцоог нэвтрүүлсэн компаниудад дэмжлэг үзүүлэх арга хэмжээ авахаа амласан. Үүнтэй холбогдуулан Хьюндай Мотор компанийн үйлдвэрчний эвлэл долоо хоног бүрийн баасан гарагт хагас өдөр ажиллаж эхэлсэн.

https://www.koreatimes.co.kr/www/nation/2024/06/281_376708.html