Төв талбайд болж байгаа "UB food" хоолны өдөрлөгийн өртөг, санхүү, зохион байгуулалтын талаар НЗДТГ-аас мэдээлэл өглөө. Энэ тухай Нийслэлийн Засаг Даргын Тамгын Газрын дарга Д.Амгалан "UB food" хоолны өдөрлөг 11 дэх жилдээ зохион байгуулагдаж байна. Энэ нь гудамжны хоол, бусад улсын үндэсний хоолны соёлыг монгол иргэддээ түгээх, жуулчдыг татах арга хэмжээ. Тухайлбал узбек хоолны өдөрлөгт манай улсын 38 тогооч дагалдан ажиллаж плов, шашлык, кебаб зэрэг хоолыг хийх технологийг суралцаж байгаа бол гадаадын иргэд ирж үйлчлүүлсэн. Эдгээр тогооч узбек хоолны үйлчилгээ нээгээд ажиллахыг үгүйсгэхгүй

Узбек улсын тогооч нарыг авчирч, дөрвөн төрлийн хоолтой долоон өдрийн арга хэмжээнд нийслэлээс 600 гаруй сая төгрөгийн зардал гарсан, олон нийтийн сүлжээнд цацагдсан шиг 1.6 тэрбум төгрөгийн зардал гараагүй. Зардлыг нийслэлийн Нийтлэг үйлчилгээний газраас гаргасан юм. Харин нийслэлийн харьяа театрын жүжигчдийн тоглолтод зардал гаргаагүй бол зарим үндэсний үйлдвэрлэгч компаниуд өөрсдийн зардлаар дотор нь ширээ, сандал тавьж жижиг асар барих байдлаар төр, хувийн хэвшил хамтран зохион байгуулж байна. Өдөрлөгт өдөрт 5,000 хүнээр бодоход долоо хоногт 175,000 сая орчим төгрөгийг нийслэлийн Нийтлэг үйлчилгээний газарт төвлөрүүлнэ гэж тооцоолсон ч өчигдөр 10,000 орчим хүн үйлчлүүллээ. Узбек хоолноос гадна цав буюу гандангийн лам нарын иддэг уламжлалт аргаар хийсэн гурилтай шөлөөр маргааш иргэдэд үйлчилнэ. Цаашид хоолны өдөрлөгт БНСУ, БНХАУ, ОХУаас оролцоно. Уг өдөрлөгийг дэлхийд танигдсан брэнд болгож, Монгол Улсаас олон улсад зарладаг хөтөлбөрт оруулж, жуулчдыг татахаар төлөвлөж байна. Гадаадын зочид Улаанбаатарт буугаад хөдөө явчихдаг. Тэнд байгалийн гоёмсог шийдлүүд байдаг бол нийслэлд даншиг наадам-хүрээ цам, хоолны өдөрлөг зэрэг жуулчдад зориулсан цөөхөн арга хэмжээ байдаг. Даншиг наадамд олон тооны жуулчин оролцдог шиг хоолны өдөрлөгийг олон улсын хөтөлбөрт оруулахаар захиалга өгсөн хүний тоо гарна" гэв. Харин төв талбайд барьсан 4,000 хүний багтаамжтай том асрыг цаашид байнгын ашиглах бөгөөд хүйтний улиралд хураах юм байна. Тус асарт хоолны өдөрлөгийн дараа Циркийн 7 хоног, шагайн харваа зэрэг арга хэмжээ зохион байгуулагдана гэв