Энэ сарын 8-наас эхэлсэн "UB food" хоолны өдөрлөг гурав дахь өдрөө үргэлжилж байна. 600 сая гаруй төгрөгөөр зохион байгуулж байгаа уг арга хэмжээ нь аялал жуулчлалыг нэмэгдүүлэх, олон орны хоолны соёлыг таниулах зорилготой гэж албаныхан тайлбарлаж буй. Өдөрлөгийн хүрээнд төв талбайд барьсан асарт узбек хоолоор үйлчилж байгаа бол өнөөдөр Гандантэгчэнлин хийдийн лам нарын гурилтай шөл цэсэд нэмэгджээ. Иргэд асарт орж узбек, монгол үндэсний хоол амтлахдаа ₮5,000 төлж орж байгаа юм.

Монгол үндэсний хоолны тухай Гандантэгчэнлин хийдийн Боловсрол, соёлын ажилтан С.Ишцог "Гандантэгчинлэн хийдийн лам нарын хоолыг хийдэг хүрэл тогоо байдаг. Энэхүү тогоог төв талбайн хоолны өдөрлөгийн асарт байрлуулж, цав буюу лам нарын иддэг уламжлалт аргаар бэлтгэсэн гурилтай шөлийг хийж байна. Лам нар өдөрт нэг удаа хооллодог бөгөөд үдээс хойш хоол иддэггүй дэглэмтэй. Хүрэл тогоонд хийсэн хоол амтлаг, шимтэй байдаг та бүхэн ирж зооглоорой" гэв.

Зохион байгуулагчдын мэдээлснээр өнөөдөр асар дотор дөрвөн төрлийн узбек хоолоор 19:00 цаг хүртэл үйлчлэх юм байна. Узбек пловны будаа, шар лууван, найман төрлийн хоолны амтлагчийг Узбекистанаас авчирсан бол хонь, үхрийн мах, хүнсний бусад ногоог дотоодоос авч байгаа гэв. Харин өдөрт 5,000 ширхэг тасалбар зарж байгаа бөгөөд эхний өдөр тасалбар нэг цагийн дотор зарагдаж дуусжээ. “UB food” олон улсын хоолны өдөрлөгт Нийслэлийн эрүүл мэндийн газрын эрүүл ахуй, халдвар хамгааллын хяналтын улсын байцаагч нар хоол бэлтгэл үйлдвэрлэлийн явцад болзошгүй эрсдэлээс урьдчилан сэргийлэх зорилгоор явцын хяналт хийж, эрүүл ахуйн шаардлагыг хангуулан, мэргэжил арга зүйгээр хангаж ажиллаж байгаа бол НОБГ-ын алба хаагчид галын аюулгүй байдлыг хангахаар бэлэн байдалд ажиллаж байгаа аж. Хоолны өдөрлөг дөрөвдүгээр сарын 14-нийг дуустал үргэлжилнэ.